Horta vizita ospitál ne’ebé trata moras kankru iha Brunei Darusalam
DILI, 08 novembru 2023 (TATOLI) – Prezidente Repúblika, José Ramos Horta, vizita ospitál iha Brunei Darusalam hodi haree direta prosesu tratamentu no fasilidade modernu sira ne’ebé utiliza hodi fó tratamentu ba moras kankru.
“Prezidente Repúblika vizita ba ospitál iha Brunei hodi haree direta ba fasilidade no tratamentu médiku sira nian ba moras kankru, iha ne’ebá Prezidente hasoru malu ho médiku sira no Ministru Saúde Brunei”, hatete Embaxadór Timor-Leste iha Brunei Darusalam Abel Guterres liuhosi komunikadu ne’ebé ne’ebé Agência TATOLI asesu hosi media Gabinete Prezidente Repúblika (GPR), ohin.
Aleinde vizita ba ospitál, Xefe Estadu mós hasoru malu ho Empreza Stratakom Globál iha Brunei ne’ebé interese atu halo investimentu iha Timor-Leste.
“Empreza Stratakom Globál mai dala hira ona hasoru malu ona ho Prezidente no agora sira komprometidu atu halo investimentu iha Timor-Leste iha área agrikultura no seluk tan, nune’e bele fó servisu ba ita-nia joven sira”, embaxadór hateten.
Nia dehan, Timor-Leste liuhosi Prezidente Repúblika no Governu loke dalan ona ba investór internasionál sira atu mai investe iha área oioin ne’ebé fó benefísiu ba Timor-Leste nia dezenvolvimentu.
Iha parte seluk, Prezidente Repúblika ho Governu Brunei selebra mós akordu ikus oinsa Timor-Leste bele haruka traballadór liu ema 20.000 ba servisu iha Brunei.
“Akordu kona-ba atu servisu iha Brunei los ona, agora Governu liuhosi SEFOPE mak tenke liga direta ho Agência sira iha ne’e no fó formasaun ba ita-nia traballadór sira, se buat hotu la’o los ona mak dezembru ita bele haruka ona ita nia traballadór 100 mai servisu iha Brunei”, nia hakotu.
Jornalista: Hortencio Sanchez
Editór : Zezito Silva
