DILI, 08 novembru 2023 (TATOLI) – Asosiasaun HAK no Konsellu Imprensa Timor-Leste hamutuk ho família Olandés hosi saudozu Sanders Robert Thoenes, kuarta ne’e, inaugura ofisiál monumentu Saudozu Jornalista Sander Robert Thoenes iha Igreja Sagradu Korasaun Jesus, Becora, Díli nia oin.
Jornalista Sander Robert Thoenes, hanesan sidadaun Olanda, mate ho idade tinan 27, tanba hetan oho hosi militár Indonézia ka milisia pro-autonomia iha loron 21 fulan-Setembru 1999 iha Igreja Becora nia oin.
Saudozu Sander Robert Thoenes hala’o nia kna’ar jornalizmu iha Timor-Leste molok Konsulta Populár ba libertasaun pátria ka Referendum iha tinan 1999 hodi kobre kona-bá violasaun direitu umanu ne’ebé halo okupasaun Indonézia iha Timor-Leste.
Iha serimónia inaugurasaun monumentu soudozu nian, reprezenta família hosi grupu ema Olanda iha Timor-Leste, Hily Bouwman agradese ba Asosiasaun HAK no ba ema hotu ne’ebé esforsu hamutuk hodi hari’i monumentu bá Sander Robert Thoenes. Tanba família haree katak fatin mate Sander Robert Thoenes nian ne’e seguru ona.
“Agradese ba kolega no ema hotu iha Timor, jornalista no ativista ne’ebé bele rekoñese Saudozu Robert Thoenes no konsidera sai símbolu no fó inspirasaun ba jornalista, ativista no ba ema hotu-hotu”, hatete Hily Bouwman iha ámbitu seremonia inaugurasaun.
Iha fatin hanesan, Diretór Ezekutivu Asosiasaun HAK, Felisiano da Costa Araújo, mós agradese tebes Padre paróku Bekora ne’ebé fó espasu hodi harii monumentu Saudozu Jornalista Sander nian hodi dignifika dedikasaun ba kna’ar jornalista iha Timor-Leste.
Entretantu, Padre paroku Bekora, Bernardo Domingos Pereira Paiva, hateten lialos ne’e ejize sakrifísiu no mate.
“Ema ne’ebé ko’alia no defende lia loos no justisa nia rohan mak mate ne’e. Iha momentu ida ne’e Sander Stone mate iha área ida ne’e, sarani Parókia no Bekora hatene loloos Sanders nia mate, oinsa mak nia mate hahú husi ne’ebé ba iha ne’ebé mak nia mate sira hotu-hotu hatene”, nia reforsa.
Nune’e, Padre Bernardo konsidera monumentu ida fó hanoin ba jornalista sira atu defende lia loos no prontu mate ba lia-loos. Ema ne’ebé defende no mate ba lia loos sira nia klamar oras ne’e iha lalehan.
Kria prémiu Sander Robert Thoenes
Prezidente Konsellu Imprensa Timor-Leste, Otelio Ote hateten Konsellu Imprensa hanesan órgaun reguladór iha área komunikasaun sosiál liuliu mahon ba mídia no jornalista sira hotu no mós jornalista estranjeiru sira ne’ebé mate iha rai Timor-Leste tanba oferese sira-nia an tomak ajuda povu Timor-Leste nia luta bá independénsia.
“Ami seidauk tau prémiu ida naran Sander Robert Thoenes award maibe ami hanoin hela iha tinan tuir mai oinsá bele koopera hamutuk atu hamosu prémiu ida atu jornalista relembra Sander nia servisu. Ita sei komunika ho família no jornalista sira ne’ebé koñese nia hodi tau prémiu nia espesialidade hanesan investigativu ka reportajen polítika internasionál. Espera ita bele tau prémiu ida ho naran Sander Robert Thoenes,” hatete Prezidente KI ne’e.
Prezidente CI ne’e lori lori komunidade mídia sira hotu agradese ba família hosi jornalista saudozu Sander Robert Thoenes ne’ebé halo kooperasaun di’ak hodi harii monument.
Iha tinan 1999 bá kotuk, nia dehan jornalista nasionál no internasionál kuaze la’o hale’u kobertura iha Dili laran no territóriu tomak, nune’e Sander Robert Thoenes mate iha ne’e haree direita.
“Hanesan jornalista ita prontu atu sai vítima ba tempu, matéria no ikus liu sai vítima ba ita-aan rasik, nune’e luta ne’ebé mak belit iha jornalista sira-nia isin mak lia-loos”, nia afirma.
Nia dehan hanesan jornalista iha tempu Indonesia nian iha Timor-Leste hatene hela jornalista Sander Robert Thoenes no mós sira seluk ne’ebé mate bá rai Timor, inklui jornalista internasionál na’in-lima ne’ebé mate iha Balibo iha loron 16 fulan-Outubru 1975.
Jornalista: Jesuína Xavier
Editór: Florencio Miranda Ximenes
