Xina kontinua apoia TL iha área edukasaun-infraestrutura-saúde
DILI, 08 novembru 2023 (TATOLI)—Prezidente Parlamentu Nasionál (PPN), Maria Fernanda Lay, kuarta ne’e, hala’ao enkontru ho Embaixadora Xina iha Timor-Leste (TL), Wang Wenli, hodi diskute kona-ba kooperasaun liuliu Xina kontinua apoiu dezenvolvimentu TL iha área importante sira.
“Ohin, enkontru ho Prezidente Parlamentu Nasionál, ami rua hala’o enkontru ho kle’an no susesu, hodi ko’alia kooperasaun liuliu asuntu edukasaun, hadi’a infraestrutura, saúde no seluk tan,” Embaixadora Xina ne’e hateten ba jornalista sira hafoin ramata enkontru iha Uma fukun PN.
Mezmu nune’e, Embaixadora ne’e la esplika detallu apoiu saida de’it iha área sira-ne’ebé temi, nune’e Xina hatudu kompromisu forte hodi apoiu dezemvolvimentu TL iha área importante sira ne’e.
Diplomata Xineza ne’e hateten, komunikasaun ho kooperasaun Xina ho Timor-Leste sai ona ezemplu di’ak ba nasaun seluk katak nasaun hotu iha direitu hanesan.
“Ho nune’e, Xina halo nia kooperasaun ho Timor-Leste hodi ajuda populasaun Timor-Leste hodi diversifika dezenvolvimentu ekonómika iha área oioin dezde hosi Timor-Leste nia independénsia ate agora no sei kontiua apoia Timor-Leste iha área oioin iha future,” nia hateten.
Jornalista : Nelson de Sousa
Editór : Cancio Ximenes
