DILI, 09 novembru 2023 (TATOLI) – Eventu Fight Night Boxe sei realiza iha Jináziu Dili, hahú iha 10-12 novembru, ne’ebé sei partisipa hosi boxista lokál no estranjeiru hamutuk 44, hosi númeru ne’e feto na’in rua.
Eventu ne’e realiza hosi klube Boxe rua hanesan El-Matador Boxe no Asalaino Boxe Club hodi komemora Loron Nasionál 12 Novembru no buka fini ba atleta foun liuhosi selesaun nasionál.
Prezidente El-Matador, Abilio Orlando dos Santos, dehan preparativu ba eventu ne’e kuaze 100% ona no hein de’it realizasaun.
“Agora ita halo tetu ba atleta sira-nia kilograma tuir klase idaidak nian, atleta sira timoroan no balun mai hosi Kupang Indonézia hamutuk na’in hitu agora sira iha ona Dili, ita-nia preparasaun la’o másimu tebes”, Abilio hateten ba Agência TATOLI, iha Ótel Ventura Lecidere, ohin.
Iha eventu ne’e klube hamutuk 11 mak sei kompete no komisaun prepara ona medalla, sertifikadu no osan ba manán na’in sira ne’ebé tuir kompetisaun ne’e.
Boxista famozu Timor-Leste ne’ebé koñesidu iha eventu internasionál sira hanesan Elidio da Conseição no Delio Mouzinho preparadu atu kompete iha Fight Night Boxe ne’ebé sei realiza iha Jinaziu.
“Ami sei hasoru Boxista sira mai hosi Kupang ne’e, ha’u sei joga ho di’ak atu bele manán sira nune’e labele hamonu nasaun nia dignidade”, Delio hateten ba Agência TATOLI iha Lecidere, ohin.
Nia dehan, preparativu durante ne’e di’ak tebes no fiar katak sei hatudu rezultadu di’ak ba nasaun no povu.
“Ha’u sei manán atleta sira Indonézia nian, sira treinu ha’u mós treinu, sae iha rin leten mak haree, tenke defende ha’u nia nasaun nia naran”, Delio hateten.
Nia hatutan, eventu ne’e hanesan mós oportunidade osan mean ida atu atleta selesaun sira gaña liután esperiénsia no hasae liután kapasidade hodi kompete iha eventu internasionál sira iha futuru mai.
Iha sorin seluk, atleta Elidio hatete, eventu ne’e importante tebes ba sira atu kompete, hodi bele aumenta liután esperiénsia iha mundu Boxe.
“Ha’u preparadu ona atu kompete, eventu ne’e importante tebes tanba ami bele book aan iha rin leten atu prepara ami nia aan ba eventu internasionál sira”, Elidio adianta.
Atividade ne’e hetan autorizasaun hosi Federasaun Boxe Amadora Timor-Leste (FBATL) no apoiu orsamentu hosi Ministériu Juventude Desportu Arte no Kultura (MJDAK) ho totál $10.000.
Jornalista: Hortencio Sanchez
Editór : Zezito Silva
