COVALIMA, 09 novembru 2023 (TATOLI)–Conselho de Imprensa (CI), kinta-ne’e, hala’o sensibilizasaun lei komunikasaun sosiál ba autoridade sira iha munisípiu Covalima.
Membru Konsellu Imprensa, Benevides Correia Barros, hateten CI hala’o sensibilizasaun lei komunikasaun sosiál ne’e hanesan atividade diária hosi CI nian, nune’e autoridade sira bele hatene regra normál ne’ebé regula ona iha lei komunikasaun sosiál.
“Públiku iha nia direitu ho interrese públiku atu hatene kualker servisu no atividade Governu nian hala’o iha nasionál no autoridade iha munisípiu hala’o servisu loos ka la loos, públiku presiza atu hatene,” Benevides Correia Barros hateten ba jornalista sira, iha salaun AMC, Sukaer Laran.
Liuhosi atividade ne’e, CI kontinua promove liberdade espresaun no liberdade imprensa ba sidadaun sira, ne’ebé haktuir ona iha konstituisaun RDTL artigu 41, iha alinea 1 hateten, iha garantia ba liberdade imprensa nian no ba meiu seluk tan kona-ba komunikasaun sosiál.
Iha alinea 2 haktuir; halo parte liberdade imprensa nian, liberdade ko’alia nian no hamoris/hakiak jornalista sira, asesu ba fontes kona-ba informasaun, liberdade editoriál, protesaun ba independénsia no ba segredu profisionál no mós direitu atu halo jornál, publikasaun ninian no meius difuzaun selu-seluk tan.
Iha alinea 3 hateten, labele permite monopóliu kona-ba meiu komunikasaun sosiál sira; no iha alinea 4 dehan Estadu hametin liberdade no independénsia ba órgaun públiku kona-ba komunikasaun sosiál, husi podér polítiku no podér ekonómiku.
Alinea 5 hosi artigu ne’e hateten, Estadu hametin ezisténsia ba servisu públiku ida ba rádiu no televizaun, ne’ebé sente livre, haree mós ba objetivu seluk, hanesan protesaun no divulgasaun kona-ba kultura no tradisaun Repúblika Demokrátika Timór-Leste nian, no fó garantia ba ema ida-idak atu hateten nia hanoin rasik; no alinea 6 hateten Estasaun emisora ba radiufuzaun no rádiu televizaun nian bele hala’o de’it ho lisensa tuir lei haruka.
Atividade sensibilizasaun lei komunikasaun sosiál ba komunidade liuliu ba jornalista sira oinsá sira bele hatene nia kna’ar loloos saida mak sira bele halo no saida mak sira labele halo.
Iha Lei Komunikasaun Sosiál, nia hateten, iha artigu 11 haktuir jornalista sira halo kobertura maibé iha nia limitasaun hanesan ba ema-nia naran di’ak, reputasaun, ema-nia privasidade, segredu justisa no mós segredu nasaun fonte informasaun labele fó sai informasaun ba públiku.
Tuir nia, fonte informasaun labele fó sai informasaun ba jornalista atu públika ba publiku, ezemplu Konsellu Ministru foti desizaun atu partisipa iha funu ruma, entaun informasaun hirak ne’e Estadu labele fó sai ba jornalista-sira tanba segredu Estadu.
Maske iha Lei Komunikasaun Sosiál artigu 11fó limitasaun ba jornalista sira atu labele fó sai segredu nasaun, maibé kna’ar sira seluk jornalista nian mak livre atu asesu informasaun tanba públiku iha dever atu hatene no autoridade iha podér polítiku iha dever atu fó informasaun.
Tanba, nia dehan, públiku iha dever atu kestiona servisu ne’ebé autoridade sira hala’o ne’e di’ak ka la di’ak, tanba iha nasaun demokrátiku labele impede servisu jornalista sira-nian no labele kriminaliza produtu jornalistika.
Reprezentante Administradór Munisípiu Covalima, Damião Amarál, husu ba partisipante atu foku tuir atividade hosi Conselho de Imprensa (CI) ne’ebé hala’o sensibilziasaun kona-ba lei komunikasaun sosiál.
“Ha’u husu ba partisipante sira atensaun ba matéria hirak ne’ebé CI aprezenta husu ita boot sira atu fó sujestaun konstrutivu, nune’e CI bele kontrola di’ak-liu ba mídia sira,” nia dehan.
Jornalista : Celestina Teles
Editór : Cancio Ximenes
