DILI, 09 novembru 2023 (TATOLI) – Ministériu Edukasaun (ME) prevee ona millaun $2,1 ba subsídiu transporte ba profesór 14.239 iha territóriu no kada manorin sei hetan $25 kada fulan. Pagamentu ba subsídiu sei hala’o iha fulan-novembru ne’e.
Diretora Nasionál Rekursu Umanu ME, Anita Tavares de Jesus, informa katak pagamentu subsídiu ba transporte ne’e ba fulan-juñu to’o novembru nian.
“Prosesu hotu halo ona no ami sei halo pagamentu ba sira hahú iha fulan-novembru ida ne’e”, Anita de Jesus reitera ba Tatoli iha Vila Verde, ohin.
Subsídiu ba fulan neen dirije ba manorin hotu, permanente, kontratadu, no ida ne’ebé asume kargu. Subsídiu ne’e nu’udar polítika Nonu Governu nian, liuliu Ministériu Edukasaun hodi ajuda profesór sira atu hala’o atividade loroloron nian, tanba durante ne’e dosente barak maka reklama katak hela dook no sira laiha kondisaun adekuada. Entaun, ME kria apoiu ida ne’e atu hakmaan difikuldade ne’ebé manorin sira hasoru.
Dirijente ne’e esplika katak pagamentu ba subsídiu refere foin maka tama iha kategoria jerál, maibé iha dezembru sei selu lahanesan tanba daudaun ne’e servisu rekursu umanu ministériu halo hela verifikasaun ba dadus profesór sira ne’ebé maka asume kargu iha eskola sira mak hanesan diretór eskola, adjuntu diretór, koordenadór no xefe gabinete apoiu tékniku no seksaun sira.
Verifikasaun ne’e atu indentifika totál manorin sira ne’ebé maka asume kargu xefia, nune’e bainhira hala’o pagamentu labele hamosu problema.
“Bainhira definisaun ne’e maka loos ona, sira-nian osan subsídiu ba transporte ne’e sei iha diferensa ho profesór sira seluk”, adianta.
Tuir dadus, manorin ne’ebé maka tama iha lista Rekursu Umanu Ministériu Edukasaun nian hamutuk 14.865 maibé depois halo verifikasaun hetan de’it profesór 14.239 no na’in-626 maka seidauk bele hetan pagamentu tanba sira-ninia númeru iha payroll seidauk iha. Tanba ne’e maka rekursu umanu ho parte finansa sei halo verifikasun no bainhira iha ona maka sei selu iha faze daruak.
Notísia relevante: Governu prosesa hela subsídiu transporte ba profesór no kargu xefia
Jornalista: Tomé Amado
Editora: Maria Auxiliadora
