DILI, 09 novembru 2023 (TATOLI) – Vise Ministru Saúde Fortalesimentu Instituisionál Saúde, José dos Reis Magno, hatete fasilidade saúde iha territóriu laran tomak sei enfrenta problema ba bee moos.
“Ha’u konversa ona ho parseiru sira kona-ba oinsá atu kria infraestrutura kona-ba bee moos nian, ba fasilidade saúde hotu iha ita-nia rain, tanba ita problema hela ba bee moos sira, entaun ha’u dehan presiza buka hatene, karik fasilidade sira atu harii karik tenke harii besik iha bee hodi asesu ba bee moos atu bele kanaliza tama ba fasilidade saúde hodi ita-nia komunidade bele utiliza”, Saúde José Magno, hatete ba jornalista sira iha Palásiu Cinzas Caicoli, ohin.
Nia haktuir, Ministériu Saúde servisu hamutuk ho parseiru no liña ministeriál sira atu haree mós ba kestaun sira bee moos.
“Ami ho pasreiru sira sei haree kanalizasaun iha fasilidade saúde sira, atu sira ajuda hodi haree ba problema sira ne’e, maibé ita hotu haree katak bee matan dook husi fasilidade saúde mak ita sei koordena ho MOP liuhosi Bee Timor Leste atu rezolve”, nia hatutan.
Iha sorin seluk, Xefe Sentru Saúde Becora, Adelina Pinto preokupa sentru refere enfrenta problema ba bee moos atu halo atendimentu iha maternidade no emerjénsia.
“Dezafiu balun ne’ebé ami hasoru mak bee moos, tanba ami uza hamutuk ho komunidade sira, entaun ami uza halo atendimentu susar tebes”, Adelina Pinto konklui.
Jornalista : Felicidade Ximenes
Editór : Zezito Silva
