Grupu joventude 22 iha Oé-Cusse implementa emprendedorizmu hatudu progresu di’ak
OÉ-CUSSE, 09 novembru 2023 (TATOLI – Diretor Sentru Juventude Rejiaun Oé-Cusse (CJRO) Dionísio Taek, kinta ne’e, fó -sai grupu joventude 22 ne’ebé hetan apoia hosi Sekretaria Estadu Juventude no Desportu iha 2021, hodi implementa programa emprendedorizmu hatudu progresu di’ak tanba balu iha mudansa.
Dionísio Taek, hateten, programa emprendedorizmu sosiál, ne’e hanesan espíritu rekuperasaun ekonómika, nu’udar programa prioridade hosi Governu atu dudu joven sira dezenvolve poténsia sira iha nível suku no aldeia ba setór produtivu hanesan pekuária, peska, turizmu konservasaun ambientál.
Notísia relevante: CJRO simu ona proposta 45 hosi grupu juventude
Nia informa, grupu joventude 22 ne’e mai hosi sub-rejiaun haat, hanesan sub-rejiaun Nítibe grupu lima (5) ho atividade sira hala’o hanesan; hakiak bibi no fahi no peska nian, iha sub-rejiaun Oésilo grupu hitu (7) ho sira-nia atividade hakiak bibi, manu no fahi.
Iha sub-rejiaun Pássabe grupu tolu (3) ho atividade maka hakiak manu, prodús baxia uza roda no hala’o servisu volúntáriu apoia proprograma iha suku, iha sub-rejiaun Pante Makasar grupu hitu (7) ho atividade maka hakiak bibi no fahi, no ortikultura.
“Grupu 22 ne’e hetan apoia maioria 40% hosi Governu atu kompleta de’it, sira-nia programa ne’ebé grupu sira atu halo, hanesan ortikultura, peska no pekuária, ne’e ita akompaña durante ne’e ita observa iha progresu di’ak, maske foin tinan rua maibé hatudu rezultadu di’ak,” Dionizio Taek, hateten iha Oé-Cusse, kinta ne’e.
Nia relembra, iha 2021, programa estimulu emprendedorizmu iha Oé-Cusse SJRO rekolla proposta hosi suku aldeia iha sub-rejiaun haat, simu proposta 48 maioria ba setór agrikultura, kuda modo, pekuária hakiak animál, peska hakiak ikan inklui proposta promove turizmu komunitária iha nível suku no aldeia.
“Maibé proposta 22 maka prienxe kritéria, entaun durante ita akompaña grupu sira, nune’e iha vontade ho esforsu rasik hodi senti-aan katak nia sai na’in ba atividade ne’ebé propoin atu hetan apoiu hosi Governu,” nia afirma.
Entretantu, programa emprendedorizmu ne’e Governu liuhosi grupu 30 ne’e iha tinan 2021-2022 daudaun ne’e SJRO prepara ona fundu hamutuk rihun $30 ne’ebé hetan apoiu hosi Sekretaria Estadu Juventude no Desportu.
Notísia relevante: SEJD lansa avaliasaun proposta empreendedorizmu iha RAEOA
Jornalista: Abílio Elo Nini
Editór: Evaristo Soares Martins
