BAUCAU, 09 novembru 2023 (TATOLI) – Materiál eleisaun suku volta daruak komposta hosi sensitivu no la’os-sensitivu kinta ne’e, transporta ona hosi nasionál ba edifísiu Sekretariadu Tékniku Administrasaun Eleitorál (STAE) Baucau.
Diretór STAE Munisípiu Baucau, Natividade Freitas Guterres, esplika, materiál hirak-ne’e ohin ekipa hosi Baucau simu direita hosi Gáafika Nasionál ne’ebé akompaña hosi autoridade postu no munisípiu inklui hetan seguransa másimu hosi Polísia Nasionál Timor-Leste munisípiu Baucau.
“Ohin ita ba distribui hosi nasionál materiál sensitivu no la’ós-sensitivu balun ho totál boletín hamutuk follla 90.800 hosi livru 1.816,” Diretór STAE Baucau hateten iha Vila Nova, kinta ne’e.
STAE Baucau deside halo kedas verifikasaun ba kada livru hosi suku 35 liuhosi Pesoál Apoia STAE Suku (PASS) nune’e antisipa mosu fallansu tékniku hanesan naran no fotografia kada kandidatura suku.
Tuir planu prosesu pakotementu sei realiza durante loron-rua hahú hosi sesta too sábadu, 10-11 novembru antes distribui ba kada sentru votasaun iha loron dumingu, 12 novembru.
“Materiál sufisiente ona tanba antes ne’e ita uza uluk ona iha eleisaun volta dahuluk nune’e sei kontinua iha volta daruak nian,” Natividade Guterres akresenta.
Munisípiu Baucau sei kontinua ho eleisaun komunitária volta daruak hamutuk 35 hosi totál suku 59 kompostu postu administrativu Baguia komposta hosi suku neen hanesan Alawa Leten, Defa-Uassi, Larisula, Ossohuna, Samalari no Uacala, postu Baucau vila suku hitu hanesan Bahú, Buruma, Caibada, Gariuai, Seisál, Tirilolo no Triloka.
Postu Laga suku rua hanesan Atelari no Tekinomata, postu Quelecai suku sia hanesan Abafala, Bualale, Lacolio, Lelalai, Macalaco, Maluro, Namanei no Uaitame.
Postu Vemasse suku lima hanesan Loilubo, Ossouala, Uaigae, Uatu-lari no Vemasse tasi no postu Venilale suku neen hanesan Badu-hoo, Baha-mori, Uaioli, Uatu-haco, Uma-ana-ulo no Uma-ana-iku.
Hosi númeru suku refere, totál kandidatura xefe suku hamutuk na’in-70 mak sei kompete iha eleisaun komunitária volta daruak iha loron-segunda, 13 fulan-novembru semana oin.
Jornalista : Natalino Belo
Editór : Evaristo Soares Martins
