DILI, 09 novembru 2023 (TATOLI) – Ministériu Saúde hamutuk ho USAID no Fundu Nasaun Unida ba labarik (UNICEF), halo lansamentu ba projetu orsamentu ho objetivu haforsa sistema saúde iha Timor-Leste (TL).
“Ohin ita halibur hamutuk iha ne’e atu lansa projetu apoiu orsamentu husi USAID ba UNICEF atu halo prevensaun no responde Covid-19 ba faze da-haat no haforsa sistema saúde iha Timor-Leste ho osan hamutuk milaun $1.35 ba 2023-2024”, Vise Ministru Fortalesimentu Instituisionál Saúde, José dos Reis Magno, informa bainhira remata lansamentu projetu iha Salaun Ministériu Saúde Caicoli, ohin.
Nia dehan, atividade ne’e hanesan kontinusaun husi programa sira ne’ebé mak dezde covid-19, hanesan faze da-haat nian ne’ebe mak USAID apoiu rekursu sira liuhosi UNICEF atu kontinua apoiu nafatin hodi halo atividade prevensaun no mós atu responde ba Covid-19.
“Ita hatene katak moras Covid-19 agora la iha maibé hanesan Estadu no Governu, ita presiza mantein nafatin situasaun diak atu ita-nia populasuan sira labele monu ba situasaun aat iha futuru mai”, nia informa.
Nia relata, intervensaun save importante ba atividade ohin nian mak atu haree ba risku komunikasaun no mós atu bele enkoraja komunidade sira atu mantein situasaunn sira ne’e hodi hakbesik aan ba fasilidade saúde sira ne’ebé mak besik atu prevene no kontrolu infesaun sira.
Nia dehan, UNICEF no USAID mak parseiru dezenvolvimentu ne’ebé valoriza tebes ba Ministériu Saúde tanba parseiru rua ne’e fó apoiu barak tebes iha área oioin inklui pandemia covid-19. Ho nune’e UNICEF no USAID hamutuk hodi responde ba Covid-19 sai hanesan kolaborasaun ida ne’ebé di’ak tebes hodi apoiu Ministériu Saúde.
Iha fatin hanesan, reprezentante UNICEF iha Timor-Leste, Bilal Durani, hateten liuhosi parseiru entre Ministériu Saúde, USAID no UNICEF intervensaun krítiku sira iha mobilizasaun komunitária, fornesimentu suprimentu no sasan salva-vida sira no renovasaun ba instalasaun bee, saneamentu no ijiene iha sentru saúde sira, kontribui ba kontrolu virus ida ne’e hala’o tiha ona iha faze oioin, ho faze da toluk besik remata iha dezembru 2023.
“Lansamentu ba faze dahaat ba programa ne’e foka liu ba reforsu liután sistema prevensaun no kontrolu ba infesaun iha nasaun ne’e”, Bilal Durani, konklui.
Jornalista : Felicidade Ximenes
Editór : Zezito Silva
