VIQUEQUE, 10 novembru 2023 (TATOLI)—Komisaun Nasionál Eleisaun (CNE, sigla portugés) Viqueque rejista irregularidade tolu durante eleisaun órgaun suku iha primeira volta iha loron 28 outubru 2023.
Tuir Komisáriu CNE destakadu Viqueque, Olávio da Costa Monteiro, kondisaun ne’e akontese tanba membru asembleia meza la domina matéria kona-ba prosesu simu kandidatura, inklui verifika dokumentu ba prosesu votasaun no kontajen votu.
“Sira hetan ona formasaun maibé ladún másimu, iha votasaun xefe aldeia nian, tanba la uza fotografia, naran tenke hakerek, prosesu la’o tarde, buletin votu balun la hakerek kandidatu sira-nia naran, la tau karimbu no la asina, sira oferese ona ba ba eleitór,” Komisáriu CNE informa ba Agência Tatoli, postu Viqueque Vila, sesta ne’e.
Notísia relevante : CNE sensibiliza lei eleisaun suku ba abitante Viqueque
Aleinde ne’e, buletin ne’ebé la asina no la tau karimbu ne’e konsidera la vale ka nulu, maibé asembleia meza konsidera vale.
“Ida-ne’e ami rejista nu’udar krime irregularidade ne’ebé mosu iha eleisaun órgaun suku,” nia akresenta.
Irregularidade seluk maka rezultadu votasaun ba xefe aldeia Bahafohu, suku Uma-Ki’ik.
“Iha aldeia Bahafohu kandidatu xefe aldeia na’in-tolu, kompostu hosi feto ida no mane rua. Tuir loloos sira avansa ba seguda volta, maibé seidauk halo votasaun, asembleia meza hamutuk ho Administradór postu sira halo konsensu kandidatu mane rua lakon, fó kandidatu feto mak manán,” nia hato’o.
Akontese irregularidade mós iha aldeia Roma, suku Babulu, postu Uatulari, kandidatu xefe aldeia iha ema na’in-rua, rezultadu votasaun votu hanesan, nune’e sira tenke hakat ba segunda volta maibé aprezenta ba meza suku laiha solusaun.
“Iha votasaun ba xefe aldeia primeira volta rezultadu votasaun hanesan, nune’e sira tenke hakat ba segunda volta. Rezultadu nafatin hanesan, sira hato’o ba meza suku la rezolve hodi lori ba postu hafoin rezolve ho dalan konsensu fó ba kandidatu idade boot liu maka sai xefe suku,” Olávio da Costa, hato’o.
Komisáriu dehan, labele fó sala ba ema, maibé presiza haree lakuna iha lei ne’ebé fó kompeténsia ba Administradór sira bele deside tuir konsiénsia, ne’ebé CNE kontinua rejista hanesan irregularidade.
“Ida-ne’e kompeténsia Ministériu Administrasaun Estatál no Sekretariadu Tékniku Administrasaun Eleitorál (STAE) hodi fó paraser bazeia ba lei númeru 09/2016 nune’e ba oin presiza hadi’a lei,” Reprezentante CNE Viqueque tenik.
Nune’e, nia husu ba oin presiza halo revizasaun ba lei númeru 09/2016 kona-ba eleisaun suku atu eleisaun órgaun suku ba iha tinan 2030 tuir mai labele akontese tan.
“Ha’u hanoin lei númeru 09/2016 la’ós ladi’ak hotu, maibé ita presiza halo revizaun tanba lei ne’e parte balun di’ak tanba fó kompeténsia ba xefe aldeia, xefe suku, delegadu/a, juventude feto/mane no lian-na’in sira. Ida-ne’e ita sente di’ak ona. Lei ne’e parte balun ladún serteza ba Administradór postu sira bele foti desizaun ruma. Ida-ne’e ami-nia pontu de vista hosi parte CNE Viqueque nian,” nia relata.
Jornalista : Vitorino Lopes da Costa
Editora : Julia Chatarina
