BAUCAU, 10 novembru 2023 (TATOLI) – Governu liuhosi Ministériu Koordenadór Asuntu Ekonómika sesta ne’e, realiza semináriu ho tema empoderamentu empreza mikro kiik no médiu iha área jestaun negósiu no kuidadu animál hodi kontribui ba kresimentu ekonómiku iha munisípiu Baucau.
Semináriu ne’e ho tema “Empoderamentu empreza mikro, kiik no médiu iha área jestaun negoiu.”
Reprezentante Vise Primeiru Ministru no Ministru Koordenadór Asuntu Ekonomia, Turismu no Ambiente atuál Diretór Ezekutivu Trade Invest, Arcanjo da Silva, esplika, mesmu governasaun iha mudansa maibé estadu kontinua prioriza setór privadu tanba konsidera kontribui ba dezenvolvimentu ekonomia iha Timor-Leste.
“Bainhira tau importánsia mak ita la fó apoia medida estratéjika atu hasa’e sira-nia kapasidade hodi dezenvolve empreza entaun sei hasoru probelema boot,” Diretór Ezekutivu TradeInvest hateten iha Vila Nova, sesta ne’e.
Bainhira atu dezenvolve setór ekonomia iha Timor-Leste presiZa instrumentu sira hanesan baze lagál, prosedimentu sira no liña setorál tanba ne’e la’ós maihosi MKAE de’it maibé kolabora ho ministériu sira seluk hanesan Justisa, Agrikultura no institusaun seluk tán.
Alende ne’e, presiza hatene identifika dezafiu nune’e presiza partilla informasaun ba malu, inovativu, utiliza sistema teknolojia, medida prosedimentu legál liuliu konsentrasaun ba jestaun emprezária.
“Ita presiza hasa’e kapasidade jestaun emprezária tanba mesmu iha tékniku profisionál emprezária maibé laiha jestaun,” Arcanjo da Silva akresenta.
Matéria importante ne’ebé hato’o iha semináriu refere hanesan jestaun emprezária no merkadoria hosi IADE, utilizasaun komérsiu no impaktu aprezenta hosi TIC Timor, emprendedorismu ba empoderamentu feto hosi AEMTL no hosi Ministériu Agrikultura Peska, Pekuária no Florestrál kona-ba mekanismu saúde animál no ai-han animal.
“Autór importante ba dezenvolvimentu ekonomia iha nasaun mak setór privadu,” akresenta.
Prezidenti CCI-TL Baucau, José Januario dos Reis ‘Noki’, hateten, semináriu refere inisiativa furak no inportante ne’ebé relevante ho emprezária sira liuhosi materiá ne’ebé fahé ba partisipantes sira.
“Alende kapasitasaun presiza mós apoia sistema ne’ebé bele suporta nafatin sira-nia kapasidade atu dezenvolve di’ak liután,” Noki hateten.
Semináriu refere organiza hosi Unidade Apoia Setór Privadu, MKAE no serbisu hamutuk ho TIC Timor, Institutu Apoia Dezenvolvimentu Emprezariál (IADE), Kámara Komérsiu no Indústria Timor-Leste (CCI-TL) no AEMTL ne’ebé partispa hosi emprezáriu lokál hosi munisípiu Lautém no Viqueque.
Jornalista : Natalino Belo
Editór : Evaristo Soares Martins
