VIQUEQUE, 10 novembru 2023 (TATOLI)—Komandante Polísia Nasionál Timor-Leste (PNTL) Eskuadra postu Uatulari, Asistente Inspetór, Pedro da Cruz de Carvalho, apela ba motorista bainhira lori motorizada tenke uza kapasete.
“Ha’u hakarak apela ba utilizadór motorizada sira iha postu Uatulari bainhira halo viajen ruma tenke utiliza kapasete atubele salva ita-nia vida,” Pedro da Cruz, hateten ba Agência Tatoli, iha postu Uatulari, sesta ne’e.
Nia hato’o lia hirak ne’e tanba akontese asidente tráfiku ida entre motorizada rua soke malu iha kuarta kalan, maizumenus tuku 22:00 hodi rezulta ema mate.
“Asidente ne’e iha área Saelirin, ami ba evakua vítima sira ba Sentru Saúde Uatulari, na’in-ida hetan kanek grave nune’e lori ba Internamentu Viqueque, ikus mai hakotu iis,” nia akresenta.
Notísia relevante : Internamentu Viqueque atende kazu emerjénsia 29 durante finadu
Nune’e mós, nia husu ba Autoridade Uatulari no abitante sira atu kumpre regra tránzitu.
“Ha’u serbisu fulan-ida resin ona iha postu Uatulari, ha’u observa Uatulari viola liu regra tránzitu. Bainhira ita la’o ba fatin públiku uza netik kapasete, liu-liu ba servidór Estadu tenke uza kapasete hotu hodi hatudu ezemplu di’ak ba sosiadade sira,” nia fó hanoin.
Jornalista : Vitorino Lopes da Costa
Editora : Julia Chatarina
