VIQUEQUE, 10 novembru 2023 (TATOLI)—Postu administrativu Viqueque Vila sei realiza kompetisaun maratona ho distánsia kilómetru hitu iha ámbitu komemora loron nasionál juventude (Masakre Santa Cruz 12 novembru 1991).
“Ami hetan apoia orsamentu $1.500 hosi Ministériu Juventude Desportu no Kultura (MJDK) hodi realiza kompetisaun maratona,” Prezidente Komisaun Organizadora ba Komemorasaun 12 novembru, Raul Pereira, informa, iha resintu edifísiu administrasaun postu, sesta ne’e.
Notísia relevante : Juventude Viqueque realiza espozisaun iha ámbitu selebrasaun Masakre Santa Cruz
Eventu ne’e loke ba sidadaun ho idade kiik to’o ema-boot iha domingu (12/11).
“Parte komisaun organizadora prepara hela prémiu liuhosi orsamentu ne’ebé ministériu atribui ba postu Viqueque Vila. Ami husu joven sira ne’ebé iha talentu ba maratona bele rejista naran hodi partisipa iha eventu desportiva maratona, atu ita joven bele festeja loron istóriku 12 novembru. Ha’u espera joven Viqueque-oan bele hola parte iha eventu desportu ida-ne’e,” nia tenik.
Jornalista : Vitorino Lopes da Costa
Editora : Julia Chatarina
