VIQUEQUE, 10 novembru 2023 (TATOLI)—Bee Timor Leste, Empreza Públika (BTL, E.P) nia implementasaun projetu melloramentu sistema bee-moos iha munisípiu Viqueque ba abitante sira iha postu administrativu Ossu, daudaun ne’e foin atinje 25% tanba ekipa responsável hasoru difikuldade mobiliza materiál bá foho lolon.
“Projetu melloramentu sistema bee-moos hosi BTL, E.P iha postu Ossu iha rua, halo kanalizasaun no seluk maka kontrusaun tanke rezervatóriu sira. Kanalizasaun agora foin atinje 25% tanba bee-matan ne’e iha foho Mundu Perdidu nia leten, nune’e empreza sira tenke lalin materiál ba foho leten. Tanba ne’e maka difikulta tékniku hosi empreza mobiliza materiál kontrusaun tanke akaptasaun, tanke hetan anin no kanu bee,” Koordenadór BTL, E.P, Marito da Costa, informa, iha ninia knaar fatin, Beloi, sesta ne’e.
Kontrusaun tanke rezervatóriu bee-moos tama faze finál ona, maibé progresu kanalizasaun mak ho pursentu ki’ik, hein bainhira kanalizasaun hotu mak hahú distribui bee tanke rezervatóriu sira.
“Ami sei hein ida-ne’e bainhira ramata mak ita bele distribui ona bee-moos ba tanke,” nia akresenta.
Notísia relevante : BTL. E,P Viqueque rekolla reseita $14.000-resin durante fulan-10
Kanalizasaun hosi bee-matan Surik Lulik liga bá postu Lacluta atinje 25% tanba ekipa téknikuo hasoru hasoru difikuldade transporta materiál onstrusaun.
Projetu melloramentu sistema bee-moos iha postu administrativu Ossu no Lacluta hhaú implementa iha marsu 2022.
Empreza responsável projetu, CDFG Unipesoal Lda, harii tanke foun tolu, reabilita tanke tolu no dada kanu hosi bee matan ba Ossu Vila, ho totál kustu $421.903,57
Enkuantu melloramentu sistema fornesementu bee-moos ba postu Lacluta Vila dada bee-moos hosi Bibileo hun ho distánsia purvolta kilémentru 4,5, ho kustu $582.100.
Projetu ne’e benefisia populasaun 2.850 hosi uma-kain 475 iha postu Ossu, enkuantu postu Lacluta benefisia populasaun 4.158 hosi uma-kain 693.
Jornalista : Vitorino Lopes da Costa
Editora : Julia Chatarina
