COVALIMA, 10 novembru 2023 (TATOLI)–Governu komemora masakre Santa Cruz 12 novembru ba dala-32 (12 novembru 1999-12 novembru 2023) iha tinan ida-ne’e ho tema “Espíritu 12 Novembru Promove Kreatividade no Pensamentu Krítiku Foinsa’e hodi Harii Sosiedade Kontribuente no Inkluzivu”.
Sobrevivente 12 Novembru, Julio Moniz “Bobo”, husu joven sira iha Covalima atu kria unidade hodi hapara violénsia hodi oho malu, baku malu no odiu malu atu kria instabilidade.
“Ha’u rekomenda ba joven hapara ona baku malu, odiu malu no oho malu. Se la’ós imi sé tan. Imi tenke eskola, tanba eskola importante atu lori rai Covalima ba oin. Nune’e, hanesan joven tenke kria unidade, tanba istória masakre 12 Novembru sei la lakon,” Sobrevivente 12 Novembru, Julio Monis “Bobo”, hateten bainhira sai oriadór iha semináriu ne’ebé realiza iha salaun eskola sekundáriu jerál Suai, sesta ne’e.
Nia husu joven Covalima tenke foku ba eskola, tanba se la foku ba eskola maka ema hosi munisípiu seluk mak sei aproveita munisípiu Covalima nia rikusoin.
Nia dehan, di’ak-liu joven sira tenke hadomi malu tanba joven loriku asswa’in sira uluk luta hodi hakilar mate ka moris ukun rasik aan, no joven sira agora tenke obedese ba inan-aman no hanoin inan-aman nia favór.
Joven sira mak sai jerasaun kontinuadór no sai joven ne’ebé konstrutivu lori munisípiu Covalima, nune’e ba oin joven sira tenke hamutuk kuda unidade nasionál atu dezenvolve Timor-Leste.
Masakre 12 novembru 1991 mosu iha semitériu Santa Cruz maibé ba dahuluk ne’e mosu iha igreja Motael nia oin, tanba saudozu Sebastião Gomes mate 28 novembru 1991.
Prezidente Komisaun Organizadóra 12 Novembru, Paul Mandeu, hateten komemorasaun 12 novembru ba dala-32 munisípiu Covalima hala’o atividade sira hanesan iha sesta (10 novembru) hala’o semináriu no kompetisaun diskursu públiku nivél ensinu sekundáriu.
Iha sábadu (11 novembru) hala’o atividade limpeza jerál, marsa saudavél, kalan reflesaun no iha domingu (12 novembru) sei realiza misa agradesimentu hafoin tau aifunan no sunu lilin iha monumentu masakre setembru negro 1999.
“Ami hala’o atividade hirak ne’e, orsamentu ami hetan apoiu hosi Centro Juventude Covalima (CJC) hamutuk $1500,” nia hateten.
Jornalista : Celestina Teles
Editór : Cancio Ximenes
