DILI, 12 novembru 2023 (TATOLI)—Vise Sekretariu Komité 12 Novembru rejiaun II Viqueque no Baucau, Emidio Amaral, hateten komemorasaun masakre 12 novembru ba dala-32 realiza iha Viqueque tanba Governu liuhosi Ministériu Edukasaun hodi envolve estudante sira iha Viqueque atu bele kompreende istória ne’e.
Notísia Relevante: Militár Sira Lori Karreta “HINO” Sama-Mate Vítima Masakre Santa Cruz
Nia hatutan, iha komemorasaun masakre 12 novembru no loron nasionál juventude ne’e, joven sira agora tenke prepara aan no hadook aan hosi violensia, tenke eskola no estuda makaas hodi serbi nasaun Timor-Leste iha loron aban.
“Komeorasaun 12 novembru ne’e ha’u hakarak husu ba joven jerasaun foun sira tenke prepara aan no hadook qan hosi violénsia, tenke aproveita eskola no estuda hodi serbi ba nasaun Timor-Leste. Banati tuir juventude loriku asswa’in sira-ne’ebé kontribui ona ba luta libertasaun nasionál no kria unidade. Labele halo barullu, maibé hanoin mak hadomi malu, dezenvolve nasaun ida-ne’e,” nia hateten ba jornalista sira hafoin kari aifunan no sunu lilin iha krus boot semitériu Santa Cruz Viqueque, domingu ne’e.
Nia dehan, Governu mós konvida saúdozu Sebestião Gomes ninia aman no inan hodi partisipa iha serimónia komemorasaun 12 novembru iha postu Viqueque Vila, nune’e ba komemorasaun 12 novembru tinan ida-ne’e difierensa tebes.
Notísia Relevante: Max Stahl: Ha’u Dedika Filme Masakre Santa Cruz Ne’e Ba Mestre Tomas “Belir” Ximenes
“Ha’u hanoin, ba oin Governu tau nafatin importansia ba komemorasaun 12 novembru sira hanesan ne’e iha munisípiu Viqueque no munisípiu seluk kada tinan,” nia dehan.
Ministra Edukasaun, Dulce de Jesus, hateten nia parte lahaluha hato’o votu parabéns ba Loron Nasionál Juventude no Masakre Santa Crúz 12 Novembro 1991 ne’e hanesan parte ida reziste ho nia prinsipiu ukun rasik aan nian
“Loron Nasionál Juventude Timor-Leste ida-ne’e sai hanesan inspirasaun ba ita-nia juventude kontinuadór sira, antes hahú luta ba independénsia no depois Juventude kontinua luta ba dezenvolvimentu Timor-Leste ida buras liu atu hasai povu hosi mukit sira,” Ministra Dulce hateten.
Juventude loriku asswa’in fó aan ba mate hodi deside Timor-Leste nia indenpendénsia, tanba ne’e oin loron Timor-Leste komemora hodi relembra eroi no no eroina sira-ne’ebé mak lakon sira-nia vida iha tempu ne’ebá.
“Komemorasaun masakre 12 Novembru hafanu ita hodi refleta fila-fali asswa’in sira-ne’ebé mak iha ona mundu seluk no sira-ne’ebé sei moris, hamutuk ho ita hodi fó honra no valoriza nia involvementu iha luta libertasaun nasionál Timor-Leste ida-ne’e,” nia dehan.
Notísia Relevante: Zeferina: "Raan Ne’e Manas Hanesan Bee-Manas"
Jornalista : Vitorino Lopes da Costa
Editór : Cancio Ximenes
