Lú-Olo: Líder nasionál la tuur hamutuk maibé mantein nafatin unidade

DILI, 12 novembru 2023 (TATOLI)–Eis Prezidente Repúblika, Francisco Guterres Lú-Olo, konsidera líder nasionál sira maske to’o agora la tuur hamutuk maibé sira kontinua mantein unidade hodi halibur nafatin timoroan hotu sai ema ida de’it.
Prezidente partidu FRETILIN ne’e hateten, atu ko’alia kona ba unidade iha Timor ne’e kontinua eziste no la’o tuir nafatin ninia dalan no ninia fatin, tanba Timor nu’udar Estadu ida-ne’ebé halibur ema hotu iha konstituisaun Repúblika Demokrátika de Timor-Leste ne’ebé halo ema sai ida de’it, hodi funda nafatin vontade tomak liuhosi harii Estadu ida-ne’ebé halibur timoroan tomak.
“Maske líder sira la hamutuk, la signifika sira fahe malu. Ha’u hanoin, ita la fahe malu liuliu líder nasionál sira. Maibé saida mak halo buat sira-ne’e akontese iha ita-nia rain mak hanoin diferensa hosi ida ba ida,” Eis Prezidente Repúblika, Francisco Gueterres Lú-Olo, hateten ba jornalista sira iha komemorasaun masakre 12 novembru ba dala 32 ne’ebé selebra iha semitériu Santa Crús, domingu ne’e.
To’o oras ne’e, nia dehan, líder nasionál sira atu lori hanoin diferensa sira hodi tau hamutuk iha fatin ida de’it, ida-ne’e mak presiza tempu atu haree didi’ak tanba presiza tempu atu define ho loloos.
Maibé, Lú Olo haktuir katak sedu ka trade buat sira-ne’e sei akontese, tanba ne’e nia husu ba ema hotu iha nasaun ne’e liuliu jerasaun foun sira atu nafatin mantein kalma hodi haburas nafatin unidade atu fó espasu ba líder sira atu hanoin.
Kona-ba líder nasionál sira-ne’ebé la marka prezensa iha komemorasaun masakre 12 novembru ba dala-32 iha semitériu Santa Crús ne’e, Lú Olo hatán, maske sira la mai tanba sira iha servisu seluk ne’ebé importante mós atu halo, maibé fiar katak sira sei lembra nafatin joven lubuk ida-ne’ebé mak mate iha fatin ida-ne’e.
“Ha’u fiar katak sira ida-idak mós halo reflesaun ba loron istóriku ida-ne’e,” Lú Olo hateten.
Jornalista : Tomé Amado
Editór : Cancio Ximenes

