COVALIMA, ELEISAUN

STAE Covalima transporta ona materiál eleisaun suku ba sentru votasaun 123

STAE Covalima transporta ona materiál eleisaun suku ba sentru votasaun 123

STAE Covalima transporta ona materiál eleisaun suku segunda volta ba sentru votasaun iha Covalima, domingu (12 novembru 2023). Imajen Tatoli/Celestina Teles.

COVALIMA, 12 novembru 2023 (TATOLI)–Sekretáriadu Tékniku Administrasaun Eleitorál (STAE) Covalima, domingu ne’e, transporta ona materiál eleisaun suku segunda ronda ba sentru votasaun 123 iha postu administrativu hitu iha Covalima.

“Prosesu transportasaun materiál ho totál viatura hosi Estadu iha munisípiu Covalima hamutuk 23 ne’e, kompostu hosi apoiu mai hosi nasionál iha viatura tolu (3), viatura ida (1) hosi STAE nasionál no uza tan viatura aluga 18,” Diretór STAE Covalima, Francisco Gusmão, hateten ba jornalista sira iha resintu edifísiu STAE, Kampung Baru, domingu ne’e.

Totál orsamentu ba aluga viatura 18 ne’e ho nia kustu hamutuk $6,480 ne’ebé kada viatura aluga durante loron tolu, nune’e kada viatura ida selu osan totál $360.00 tanba viatura ida selu ho osan hamutuk $120.00.

Tuir kalendáriu, bazeia ba baze legál lei eleisaun suku númeru 9/2016 ne’e haktuir, votasaun iha kada sentru votasaun hahú iha tuku 09h00 dadeersan no sei ramata halo votasaun iha tuku 15h00 lorokraik, maibé to’o iha oras terminadu mak eleitór sira sei forma iha liña mak ema hirak ne’e bele ezerse sira-nia direitu votu to’o ramata.

Tuir dadus, kandidatura xefe suku ne’ebé avansa ba segunda ronda hamutuk 49 no hosi númeru ne’e feto na’in-tolu (3) ne’ebé mai hosi postu administrativu Fatululik feto na’in-ida (1) no postu Administrativu Tilomar feto na’in-rua (2).

Komandante PNTL munisípiu Covalima, Superintendente Polísia Calisto Gonzaga hateten Sekretáriadu Tékniku Administrasaun Eleitorál (STAE) Covalima, transporta ona materiál materiál eleisaun sensitivu ho la’ós sensitivu to’o iha sentru votasaun, nune’e sei koloka pesoál seguransa hodi tau matan.

“Ita koloka ita-nia rekursu seguransa iha sentru votasaun 123 ne’ebé koloka seguransa iha sentru votasaun balun ida no balun na’in-rua,” nia dehan.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!