DILI, 13 novembru 2023 (TATOLI) – Komunidade suku Comoro, Postu Administrativu Dom-Aleixo, Munisípiu Dili, iha votasaun volta daruak, segunda ne’e, fó votu konfiansa ba kandidatu xefe suku Eligio José Marcál, atu sai xefe suku ba mandate tinan hitu, hahú hosi tinan 2023 to’o 2030.
“Ha’u agradase ba votu konfiansa hosi povu Comoro atu sai sira nia servidór. Iha mandate tinan hitu ne’e hakarak fó prioridade ba atendimentu populasaun ho transparénsia”, hateten Xefes uku eleitu ne’e ba Agência TATOLI,I.P iha Comoro-Dili.
Tanba Xefe Suku eleitu ne’e ho misaun no vizaun mak hakarak dezenvolve suku laran liuhusi hametin ba pás no estabilidade.
“Ha’u sei hamutuk ho komunidade hodi garante pás no estabilidade iha suku laran atubele hala’o atividade formasaun, organiza eventu kulturál no limpeza”, nia garante.
Xefes uku eleitu ne’e hatutan nia sei promove kulturál hodi hametin lasu amizada entre komunidade suku laran ho komunidade suku seluk iha kapitál Dili atu hapara konflitu.
Eligio José Marçal hetan vitória ho votu 5.778 ne’ebé koresponde ho 56%, enkuantu Eurico Guterres hetan votu 4.609 ekivalente 44% hosi totál eleitór 10.431.
Jornalista : Jesuína Xavier
Editor : Florêncio Miranda Ximenes
