LAUTÉM, 13 novembru 2023 (TATOLI)- Komunidade suku Bauro, Postu Administrativu Lospalos, Munisípiu Lautém, fó votu konfiansa ba Florindo Miranda sai xefe Suku Bauro ba períodu 2023 to’o 2030.
Kandidatu Xefe Suku Florindo Miranda, ho númeru sorteiu ida (1) konsege hetan vitória iha volta daruak ho votu 657 no kandidatu Cidalio Freitas atuál xefe suku Bauro, ho númeru sorteiu rua ho votu 626.
“Agradese ba komunidade suku Bauro tomak ne’ebé liuhosi prosesu demokrátiku fó votu konfiansa mai ha’u atu sai xefe suku. Iha ha’u-nia lideransa sei sai servidór ne’ebé hakuak komunidade hotu hodi promove unidade, garante dezenvolvimentu ne’ebé partisipativu, inkluzivu no ekuitativu,” Xefe Suku eleitu ne’e ba Agência TATOLI, iha aldeia Sepelata-Bauro.
Tuir nia, ho komunidade nian konfiansa ne’e mak hakarak serbí abitante suku Bauro ne’e ho domin.
“Ha’u kandidatu aan ba Xefe suku atu serbí povu ho domin tanba domin mak sai xave atu hatudu progresu serbisu, liuliu dezenvolvimentu suku nian,” nia afirma.
Xefe suku eleitu ba períodu 2023 to’o 2030 ne’e, ho vizaun hakarak garante prosperiedade komunitária suku Bauro nian.
Enkuantu ho misaun atu “Promove unidade, garante dezenvolvimentu ne’ebé partisipativu, inkluzivu no ekuitativu”.
Ho konfiansa ne’e, nia dehan sei serbí komunidade tuir kompeténsia ne’ebé prevee iha lei suku ho númeru 9/2016, iha artigu 6 kona-ba kompeténsia sira.
Ho derivasaun hosi kompeténsia hirak-ne’e, nia define ona programa sira prioritáriu ne’ebé sai projetu importante ba ‘’bem comum’’ komunidade nian.
Programa hirak-ne’e sumariza hosi baze kompeténsia ne’ebé atribui hosi lei suku mak hanesan tuir mai, dijitaliza sistema administrasaun suku (Tuir kompeténsia aliña M,N, O, P), Desportu (Kampu boot no multifunsaun) (aliña T), Edukasaun (Sentru formasaun komunitária) (aliña J), Sentru kulturál (aliña A to’o E) no Unidade kooperativa suku (A to’o D).
“Ita hakarak sensibiliza membru sira hosi komunidade kona-ba importánsia hosi eskola ba labarik no halo mobilizasaun hodi kombate abandonu eskolár mak ho rezolusaun ba resposta ho tipu fasilita formasaun,” nia afirma.
Iha setór ekonomia, nia dehan sei promove no fasilita maka’as instituisaun hosi kooperativa komunitária sira, promove atividade ekonómiku povu liuhosi kooperativa modelu merkadu finanseiru.
“Tanba ita hakarak haforsa ekonomia povu suku Bauró liuhosi atividade produsaun hodi kombate menus ai-han no haforsa kresimentu ekonomia povu suku Bauró liuhosi atividade mikro negósiu,” nia hateten.
Nia hatutan, ba setór importante hotu ba abitante suku Buaro, mak nia sei koordena di’ak ho parseiru sira hanesan Governu Sentrál no munisipál, ONG nasionál no Ajénsia Internasionál, Instituisaun Akadémika, Uma Kreda hotu iha Timor-Leste.
Iha biban ketak, Kandidatu Cidalio Freitas, mós hato’o agradesementu ba komunidade ne’ebé fó votu konfiasa ba nia.
“Obrigado barak ba Komunidade no povu suku Bauro tomak durante tinan 13 sai servidór bai mi hotu, no deskulpa barak no husu perdaun mai ha’u-nia sala,” nia katak.
Nia dehan, nu’udar sidadaun no nu’udar juventude rezisténsia prontu iha kualkér tempu atu koopera ho xefe suku eleitu.
Totál eleitór suku Bauro hamutuk 2.149. Hosi númeru ne’e totál eleitór ne’ebé vota 1.283 no eleitór ne’ebé la partisipa votasaun 866.
Totál eleitór ne’ebé ezerse nia direitu votu na’in-1.283, kompostu hosi Aldeia Sepelata ho eleitór 184, Aldeia Iralafai na’in-256, Aldeia Bauro 406, Aldeia Luarai 259 no aldeia Somoco na’in-187.
Re-lembra katak, Iha loron 13 outubru 2023, kandidatu xefe suku sira iha suku Bauro aprezenta lista ba meza asembleia suku no aldeia hamutuk 10, kompostu husi mane na’in-sia no feto na’in-ida.
Iha primeira volta iha kandidatu na’in-10, hanesan kandidatu Adérito Cosme Marques (numéru sorteiu 1), Americo Lopes (2), Avelina Madalena Dos Santos (3), Armindo dos Santos (4), Cancio da Costa (5), Florindo Miranda (6), Florival Salazar da Costa (7), Gil dos Santos (8), Judito Bernardino (9) no Xefe suku atuál ne’ebé re-kandidata aan, Cidalio Freitas (10).
Jornalista: Florencio Miranda Ximenes
Editór: Evaristo Soares Martins
