Juvinal da Conceição mantein lidera Suku Bidau Akadiruhun ba 2023-2030
DILI, 13 novembru 2023 (TATOLI) – Kandidatu Xefe Suku, númeru rua, Juvinal da Conseição, kontinua lidera suku Bidau akadiruhun ba tinan 2023-2030 ho votu 759.
“Ha’u agradese ba populasaun iha Suku Bidau Akadiruhun ne’ebé nafatin fó fiar mai ha’u atu lidera ba 2023-203 atu servisu hamutuk ho povu ba dezenvolvimentu nasaun nian”, Juvinal da Conceição dehan ba Tatoli iha sentru votasaun Aldeia Bedik, Suku Akadiruhun, Postu Administrativu Na’in Feto, Munisípiu Dili, ohin.
Nia hateten, programa sira ne’ebé mak durante halo ona fó benifisiu ba populasaun iha Suku Akadiruhun tanba ne’e mak sira kontinua tau fiar atu lidera tan tinan hitu mai.
”Ha’u-nia programa durante ne’e la’o mak haree liuba sosiál sira hanesan idozu, kbiit laek, bolsa da mae no mós Programa Nasionál Dezenvolvimentu Suku (PNDS) ida-ne’e mak ha’u tau nafatin prioridade ba oin atu dezenvolve suku ne’e ho di’ak”, nia relata.
Nia esplika, hanesan lideransa lokál sei la servisu mesak maibé servisu hamutuk ho juventude sira atu kolabora malu hodi lori suku ne’e ba oin.
”Ha’u la’os servisu mesak maibé ha’u husu ba povu no juventude sira atu kolabora hamutuk atu lori suku ida-ne’e ba oin tanba vizaun ha’u nian katak hakarak ka lakohi ita tenke hamosu unidade atu bele dudu dezenvolvimentu suku ne’e atu moris di’ak iha futuru”, nia haktuir.
Nia adianta, tinan oin, Suku Bidau Akadiruhun sei harii sentru juventude banhira poder lokál iha.
”Se karik iha tinan 2024 mak programa dezentralizasaun, poder lokál iha mak ha’u sei halo planu atu harii sentru juventude atu bele lori dezenvolvimentu la’o ba oin”, nia informa.
Iha fatin hanesan, ekipa susesu kandidatu numeru ida, João Paulo, sente triste tanba partisipasaun komunidade nian menus.
“Ami hanesan ekipa susesu kandidatu númeru ida sente triste tanba haree ba partisipasaun komunidade menus tanba kompara ho primeira volta númeru eleitor sa’e no segunda volta númeru tun, ida-ne’e insusesu boot ba konsellu hamutuk ho xefe suku sira la organiza povu atu mai vota, tanba konsellu suku sira la fó informasaun ba povu tanba ne’e ba futuru tenke hadia”, nia husu.
Suku Bidau Akadiruhun iha kandidatu na’in-rua ne’ebé kompete atu sai xefe suku, husi kandidatu numeru 1 ho naran Julio Morreira ho votu hamutuk 646 no kandidatu númeru 2 ho naran Juvinal da Conseição ho votu 759, husi kontajen votu iha mós nulu lima no branku la iha. Suku ida-ne’e iha sentru votasaun tolu hanesan Aldeia Bedik, Nuu badak no Kuluhun de baixo.
Jornalista : Felicidade Ximenes
Editór : Zezito Silva
