COVALIMA, ELEISAUN

“Komunidade hotu tenke partisipa másímu hili líder komunitária”

“Komunidade hotu tenke partisipa másímu hili líder komunitária”

Administradór Munisípiu Covalima, Francisco de Andrade. Imajen Tatoli/Celestina Teles.

COVALIMA, 13 novembru 2023 (TATOLI)–Administradór Covalima, Francisco de Andrade, hateten iha eleisaun suku segunda volta ne’e komunidade nia kontribuisaun importante tebes hodi hakat ba sentru votasaun atu hili sira-nia líder komunitária.

Notísia Relevante: Ohin, Timor-Leste realiza eleisaun suku segunda ronda

Ita nu’udar komunidade labele ezije de’it ita-nia direitu maibé tenke hatene mós ita-nia dever, tanba eleisaun ba lidér komunitáriu tinan hitu (7) akontese dala ida. Komunidade hotu tenke partisipa másímu hodi hili líder komunitária,” Autoridade Covalima ne’e hateten ba Agência Tatoli iha Kampung Baru, segunda ne’e

E;eisaun suku atu hili lider komunitária ne’e la’ós partdu polítika sira mak realiza maibé povu rasik mak hili, nune’e povu nia konstribuisaun hodi hakat ba sentru votasaun hili líder komunitáriu ne’e importante tebes.

Tanba ne’e, nia dehan, komunidade tenke iha konsiénsa no morál atu partisipa eleisaun líder komunitária ba segunda volta ne’e hodi bele hasa’e taxa partisipasaun.

Diretór STAE Covalima, Francisco Gusmão, hateten bazeia ba lei númeru 9/2016 eleisaun ba xefe suku sira hahú halo votasaun iha tuku 09h00 ne’ebé sei ramata iha tuku 15h00.

“Ita sei halo kontajen inisiál iha sentru votasaun ne’ebé mak kria ona. Hafoin ita sei rekonsilia akta sira ba sede suku iha loron 14 fulan-novembru 2023,” nia hateten.

Prosesu eleisaun hafoin rekonsilia akta nia rezulta transporta kedas ba administrasaun postu Administrativu hodi asegura materiál.

Enkuantu, STAE Covalima nia preparasaun ba eleisaun suku segunda ronda ne’e, hahú transporta materiál hosi nasionál mai iha Covalima no kontinua halo verifikasaun materiál sensitive sira.

Iha loron 12 fulan-novembru, STAE Covalima transporta materiál eleisaun suku segunda ronda ba sentru votasaun 123 ne’ebé mak STAE kria ona iha postu administrativu hitu iha Covalima.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!