PAM Baucau kestiona sentru votasaun Betulale hahú la tuir lei
BAUCAU, 13 novembru 2023 (TATOLI) – Prezidenti Autoridade Munisipál (PAM) Baucau kestiona sentru votasaun ne’ebé hahú sedu la tuir lei-númeru 9/2016 kona-ba lideransa komunitária.
Prezidenti Autoridade Munisipál (PAM) Baucau, Olivio ‘Bou-lesa’ Freitas, hato’o kestaun ne’e relasiona ho sentru votasaun iha aldeia Betulale, suku Tirilolo ne’ebé hahú loke iha oras 07:00 dadeer tanba la tuir lei-númeru 9/2016 ne’ebé hateten kada sentru votasaun tenki loke iha oras 09:00 dader no taka iha 0ras 15:00 lokraik.
“Tékiku Sira iha ne’e loke sedu ne’e kontra lei, tuir lolos labele, sira hotu simu instrusaun no tuir treinamentu, hatene saida mak bele halo no saida mak labele halo, Sira hotu simu informasaun ida nee,” PAM Baucau ko’alia iha sentru votasaun Betulale, sede suku Tirilolo Vila antiga, segunda ne’e.
Olivio Freitas, argumenta, sentru votasaun seluk loke tuir oras nune’e eleitór kontinua forma tuir liña hodi ezerse dereitu iha elisaun komunitária volta daruak, enkuantu sentru votasaun Betulale menus tanba sentru refere loke sedu.
Bou-lesa konsidera, prosesu refere STAE Baucau mak hatene relasiona ho desizaun refere enkauntu Autoridade Munisipál Baucau nu’udar nain ba eventu demokrasia komunitária koordena no halo kontrolu deit tuir lei-númeru 9/20216.
“STAE rasik mak sei esplika tanba ne’e hau husu atu kontinua servisu tuir lei katak to’o tuku tolu eleitór sira mai forma ona iha liña laran atende to’o hotu, enkuantu neebe mai tarde labele tuir tanba lei bandu” Bou-Lesa akresenta.
Diretór STAE munisípiu Baucau, Natividade Freitas Guterres, STAE apoiu ona formasaun inklui informasaun ba membru asembleia meza atu implementa eleisaun tuir lei nune’e bainhira mosu faillansu hanesan sentru votasaun hahú sedu ,iha reklamasaun ruma ne’e prezidente meza mak iha kompetensia atu rezolve.
“STAE la iha orientasaun, so hato’o informasaun ba sira atu implementa buat hotu-hotu tuir lei- númeru 9/2016 katak kompeténsia tomak iha konsellu suku nia liman, karik sira mak hamutuk hanesan ne’e,” Natividade Freitas akresenta.
Munisípiu Baucau iha elisaun komunitária volta daruak hamutuk suku 35 hosi kandidatura nain-70 hafoin volta dahuluk kandidatura nain-24 eleitu ona nu’udar xefi suku hosi suku 59 iha Baucau.
Jornalista : Natalino Belo
Editór : Evaristo Soares Martins
