ERMERA, 14 novembru 2023 (TATOLI) – Autoridade postu administrativu Ermera vila, munisípiu Ermera, husu ba xefe suku eleitu sira atu serbí komunidade ho laran no responsabilidade.
“Sai xefe suku ida, iha tinan hitu nia laran, nia tenke serbí povu tanba povu fó konfiansa ida liuhusi eleisaun ida-ke livre, sekretu, demokrátiku no responsabilidade,” Administradór Postu administrativu Ermera Vila, Alexandre dos Santos Salsinha hateten, ohin.
Administradór fó hanoin ba xefe suku eleitu sira katak votu konfiansa husi povu la’ós kargu previlejiu, maibé kargu ida atu serbí.
“Sai xefe suku ida, iha tinan hitu nia laran, nia tenke serbí povu tanba povu fó konfiansa ida liu husi eleisaun ida-ke livre, sekretu, demokratiku no responsabilidade,” nia haktuir.
Administradór Alexandre husu xefe suku eleitu sira atu ukun ema hotu ho tratamentu hanesan; Labele hare ba grupu A ka grupu B, no Partidu A ka B. “Serbí ema hotu hanesan katak, la’ós de’it serbí sira ne’ebé mak fó votus maibé serbí mós sira ne’ebé mak fó votu ba kandidatu seluk.”
“Ha’u-nia lia-menon mak ne’e, ba xefe suku eleitu iha Ermera laran tomak, imi tenke ukun ho fuan, responsabilidade no maturidade no labele halis ba grupu ida,” nia reitera.
Administradór ne’e relata katak situasaun eleisaun líder komunitária, ein-jerá, iha Postu administrativu Ermera Vila la’o ho di’ak no hakmatek. “Maske iha primeira ronde mosu dezafiu balun tanba buletin votu ba kandidatu ida iha suku Riheu laiha, maibé ita konsege rezolve. Enkuantu, eleisaun segunda ronde la’o diak tebes tanba kandidatu ne’ebé lakon no ida ne’ebé manan iha kooperasaun di’ak tebes.”
Alexandre dos Santos Salsinha, husu ba Governu no Parlamentu Nasionál atu halo alterasaun ba Lei Suku n. º 9/2016, 8 jullu atu pevene fallansu ki’ik-oan ne’ebé mak akontese labele repete iha futuru.
“Primeiru, tenke hadi’a buletin votu. Entaun, tenke taka foto kandidatu delegadu/a no xefe aldeia sira nian iha buletin votu atu nune’e fasilita aman no inan idozu sira. Segundu, persiza hadi’a sistema eleisaun segunda ronde ba delegadu/a no xefe aldeia sira, tanba iha suku balun, bainhira hakat ba segunda ronde, eleitór barak fila ona. Entaun taxa partisipasaun menus tebes,” nia esplika.
Xefe Suku re-eleitu Suku Poetete, Felisberto das Neves kompromete atu kontinua serbí povu ho neutru no imparsiál hodi serbí ema hotu hanesan.
“Ha’u-nia planu ne’ebé traxa ona mak sei hato’o ba leten atu fornese bee moos no eletrisidade ba komunidade balun ne’ebé mak sedauk hetan. Komunidade barak iha Aldeia Poepu no Loblala seidauk hetan bee moos no eletrisidade. Tanba ne’e mak durante périodu tinan hitu mai ne’e tenke hato’o ba leten atu hadi’a problema hirak ne’e,” nia haktuir.
Felizberto hetan fiar hodi re-eleitu ba xefe suku Poetete périodu 2024-2030 iha primeira ronde ho votu hamutuk 2408 husi aldeia 12.
Nune’e mós, xefe suku eleitu foun husi Suku Ponilala, Alberto Martins promete atu serbí nia populasaun ho transparánsia, onestu no haku’ak ema hotu.
Nia dehan, durante ninia ukun, programa ajudu husi Estadu no Organizasaun Naun-Governamental (ONG) sira tenke iha distribuisaun hanesan ba Aldeia hotu iha suku Ponilala.
Alberto Martins hetan vitória iha segunda ronde ho votu hamutuk 1,120 hus Aldeia lima iha suku ponilala.
Tuir observasaun Ofisiál Polísia Suku Ponilala (OPS), Herculano Soares Trindade, situasaun seguransa ein-jerál, iha suku Ponilala no iha postu administrativu Ermera Vila laran tomak lao ho hakmatek.
“Durante eleisaun suku tantu iha primeira ronde no segunda ronde, buat hotu la’o di’ak iha suku Ponilala, nune’e mós iha suku seluk iha postu administrativu Ermera vila,” nia haktuir.
Jornalista: Filomeno Martins
Editór: Rafael Ximenes de A. Belo
