COVALIMA, 14 novembru 2023 (TATOLI)–Administradór munisípiu Covalima, Francisco de Andrade, husu ba xefe suku foun ne’ebé foin eleitu liuhosi eleisaun primeira no segunda volta, sai líder komunitária atu serbí komunidade ho fuan.
“Ita iha esperansa nafatin, tanba xefe suku-sira hala’o servisu bazeia ba lei atu serbí ba sira-nia komunidade ho fuan. Ita hotu hatene kualker planu asaun anuál mai hosi suku,” Autoridade Covalima, Francisco de Andrade, hateten ba jornalista-sira iha resintu AMC, Sukaer Laran, tersa ne’e.
Autoridade Covalima ne’e hateten, iha munisípiu Covalima iha nia suku hamutuk 30 maibé iha suku 24 mak avansa ba eleisaun segunda ronda, tanba iha suku neen (6) ne’e ninia xefe suku eleitu kedas iha eleisaun primeira ronda.
Iha eleisaun suku segunda volta ne’ebé realiza iha 13 fulan-novembru ne’e, STAE Covalima kria sentru votasaun 123 iha postu administrativu hitu iha Covalima.
Tuir planu, xefe suku foun sira-ne’e sei simu tomada pose iha komemorasaun loron proklamasaun independénsia ba dala-48 (28 novembru 1975-28 novembru 2023).
“Eleisaun xefe suku segunda ronde finaliza ona. Ita sei hala’o serimónia tomada de pose iha loron 28 fulan-novembru ne’ebé sei realiza iha postu administrativu hitu,” nia dehan.
Jornalista : Celestina Teles
Editór : Cancio Ximenes
