DILI, 14 novembru 2023 (TATOLI)—Deputada hosi bankada FRETILIN iha Parlamentu Nasionál (PN), Maria Angelica Rangel da Crus, husu Governu liuhosi parte kompetente atu kontrola sidadaun ka komunidade ne’ebé sunu rai iha foho lolon.
“Ahí han rai ne’e kestaun nasionál ida. Ita tenke haree liuliu Governu, tanba iha fatin barak komunidade sunu rai halo rai mutuk no rai manas. Agora, bailoro naruk, tanba ita ba tiha sunu iha foho leten, bee-matan sira bele maran no hahalok ne’e la di’ak,” nia levanta liuhosi reuniaun plenária PN, tersa ne’e.
Tanba ne’e, nia husu Governu tenke tau matan ba asuntu ne’e tanba sunu rai iha fatin-fatin fó impaktu makaas.
“Ha’u la’o ba kosta súl nian, haree hanesan fatin Laclubar, no haree fatin sira-ne’ebé ai barak ne’e komesa su’ar lakan iha ne’eba ho ahí,” nia dehan.
Tanba sunu rai iha foho lolon ne’e nia implikasaun mak halo bee-matan maran no bailoro naruk, tanba ne’e se bee maran ne’e agrikultór atu halo natar oinsá.
“Nune’e, presiza haree prevensaun sira atu komunidade labele sunu rai tanba kria ambiente ladún di’ak, nune’e impaktu ba buat barak.
Jornalista : Nelson de Sousa
Editór : Cancio Ximenes
