DILI, 14 novembru 2023 (TATOLI) –Vise Primeiru-Ministru no Ministru Koordenadór Asuntu Ekónomika no Ministru Turizmu Ambiente, Francisco Kalbuadi Lay, atualiza ba Xefe Estadu José Ramos Horta kona-ba prosesu adezaun Timor-Leste ba Organizasaun Mundiál Komérsiu (OMK).
“Ha’u mai atualiza ba Prezidente Repúblika kona-ba asuntu OMK nian tanba ita-nia adezaun finaliza ona, sei falta atu kompleta lejislasaun balun”, Kalbuadi dehan ba jornalista sira iha Palásiu Prezidensiál, ohin.
Nia dehan, kona-ba lejislasaun ne’ebé seidauk finaliza, aban iha reuniaun Konsellu Ministru aprova lejislasaun ne’ebé OMK presiza haruka ba Parlamentu Nasionál hodi ratifika atu bele lori ba Prezidente Repúblika promulga.
“Lejislasaun hamutuk 11, aban Konsellu Ministru sei aprova nune’e bele haruka ba Parlamentu Nasionál hodi ratifika hodi haruka ba Prezidente Repúbkika promulga, lejislasaun sira ne’e, aban aprova mak fó sai”, Kalbuadi hakotu.
Jornalista: Hortencio Sanchez
Editór : Zezito Silva
