Klamar Fuik tau ai-funan iha Jardin Seroja Indonézia
JAKARTA, 14 novembru 2023 ( TATOLI) – Ministru Defeza (MD), Donanciano Costa ‘’Pedro Klamar Fuik’’ ho delgasaun vizita jardim eroi Seroja iha Cilangkap, hodi presta omenajen ba eroi sira ne’ebé mate iha operasaun Seroja, hahu 1975 to’o 1999.
“Vizita ida-ne’e ha’u mai atu bele fó respeita ba soldadu hothotu ne’ebé mak kauza mate tanba kumpre misaun sira hothotu. Sira mate hanesan eroi, mesmu ke sira mate ho razaun ne’ebé mak la hanesan entre Estadu rua, entre nasaun rua”, Klamar Fuik hateten ba jornalista sira hafoin tau ai-funan iha jardim Eroi Seroja iha Cilangkap, Cipayun Jakarta Timor, tersa ne’e.
“Sira hola parte iha istória koletiva rai rua, entre nasaun rua ne’ebé mak ohin loron sai hanesan nasaun viziñu, sai hanesan rai ne’ebé mak di’ak iha pás bele sai ezemplu ba rai barak ne’ebé mak hanesan viziñu maibé la konsege moris iha pás nia-laran”, nia adianta.
Ho vizita ida-ne’e, nia husu ba sidadaun rai rua, Timor-Leste ho Indonézia, atu husik istória pasadu, hodi hateke ba futuru atu hametin relasaun amizade entre rai rua nian.
“Ita simu realidade ne’ebé iha pasadu ho fuan bo’ot. Ita hamutuk ita konstrui prezente no futuru, iha pás nia naran”, Governante afirma.
Hafoin vizita jardim eroi Seroja Indonezia, Pedro Klamar Fuik entrega tais timor ba militar sira nudar jestu hametin kooperasaun entre rai rua.
Jornalista: Natalino Costa
Editór : Zezito Silva
