Top

Membru PN husu Governu hamatan ba sobrevivente masakre 12 novembru

Juventude Lorico Asswa’in ne’ebé sai vítima, Amali no Levi, iha Masakre Santa Cruz 12 Novembru 1991. Imajen/Espesiál

DILI, 14 novembru 2023 (TATOLI)—Membru Parlamentu Nasionál (PN) husu Parlamentu Nasionál halo omenajen minutu ida hakmatek ba eroi juventude loriku asswa’in sira, no husu Governu atu hamatan ba sobrevivente masakre 12 novembru 1991.

Notísia Relevante: Komemorasaun 12 novembru hanesan lisaun valór nasionalizmu no patriotizmu

“Hakarak fó parabéns no korajen nafatin ba sobrevivente 12 novembru sira-ne’ebé ohin loron sei moris hela. Ha’u husu Governu tau atensaun ba kolega no kompatriota balun tanba agora daudaun sofre hela no bala musan ne’ebé sei hanuuk-aan iha sira-nia isin. Balun to’o agora sei moras hela, tanba hetan konsekuénsia torturasaun hosi 12 novembru 1991,” Deputadu bankada CNRT, Natalino dos Santos, hato’o liuhosi intervensaun iha reuniaun plenária PN, tersa ne’e.

Deputada CNRT, Veneranda Lemos, parabeniza loron juventude nasionál 12 novembru ne’ebé povu tomak komemora, tanba loron istóriku ida-ne e fó hanoin fila-fali ba timoroan hotu-hotu katak juventude mak sai aliserse ba Timor-Leste.

Deputada CNRT, Aliança da Conceição Araújo, hateten loos duni katak sobrevivente juventude loriku asswa’in barak mak agora dezempregu laiha serbisu no balun moras, nune’e Governu labele taka matan ba sira.

Deputada FRETILIN, Nurima Alkatiri, hateten iha loron 12 novembru 2023 ne’e Timor-Leste komemora tmsakre 12 novembru ba dala-32, tanba masakre ne’e marka istória katak juventude loriku asswa’in barak ne’ebé lakon no sakrifika sira-nia vida ba rai ida-ne’e.

“Sira-nia imajen ne’ebé hale’u mundu tomak no halo ema barak loke matan hatene ho klaru saida mak akontese iha ita-nia rai-laran ho presaun no violénsia,” nia dehan.

Deputada FRETILIN, Maria Angelica Rangel da Crus, parabeniza loron nasional juventude hodi relembra masakre 12 novembru 1991 ne’ebé mak fanu mundu tomak, katak funu iha Timor ne’e eziste no ohin loron Timor-Leste sai nasaun ida soberanu.

“Ohin, ita rona ko’alia barak kona-ba ita-nia istória. Istória mak hateke ba futuru tenke iha pasadu ne’ebé mak iha abut. Se ita laiha abut, ita ko’alia abut ne’e la metin, isin ne’e namlele nafatin,” nia hateten

Juventude uluk ne’e tenke inspira fali juventude agora atu prienxe dezenvolvimentu ho abut ne’ebé iha ka istória ne’ebé juventude loriku asswa’in sira husik hela, atu jerasaun foun sira bele moris banati.

“Signifika juventude tenke matenek, juventude la’ós atu ba baku malu de’it no la’ós atu ba estraga malu. Maibé juventude tenke iha abut no sai lalenok, tanba juventude uluk nian ne’e harii unidade nasionál, sira hamutuk halo manifestasaun pasífika ne’ebé fanu mundu tomak katak funu iha Timor ne’e eziste duni,” nia hateten.

Deputadu hosi bankada opozisaun ne’e hateten, sobrevivente 12 novembru barak mak mós sei terus hanesan moras, laiha serbisu iha tempu ukun aan ida-ne’e, nune’e IX Governu Konstitusionál presiza tau matan mós ba sira.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!