DILI, 14 novembru 2023 (TATOLI)—Parlamentu Nasionál (PN) felisita xefe suku eleitu iha eleisaun líder komunitáriu primeira ronda no segunda volta no husu atu serbi povu ho di’ak.
Notísia Relevante: Ohin, Timor-Leste realiza eleisaun suku segunda ronda
“Eleisaun suku segunda ronda ne’e la’o di’ak, tanba eleitór sira la forma kle’ur ona kompara ho eleisaun primeira ronda,” Prezidente Parlamentu Nasionál, Maria Fernanda Lay, hateten liuhosi reuniaun plenária PN, tersa ne’e.
Deputada Partidu Demokrátiku (P)D, Sanchia Tilman, hato’o felisitasaun ba xefe suku eleitu iha primeira ronda no segunda volta ne’ebé realiza iha 28 outubru 2023 no 13 novemvru 2023.
Deputada FRETILIN, Cristina Revelo, parabeniza povu Timor-Leste ne’ebé horisehik ezerse ona sira-nia direitu votu iha eleisaun suku segunda ronda volta no felisita mós xefe suku eleitu sira hotu liuliu ba feto maluk sira iha eleisaun líder komunitáriu tinan ne’e, iha feto na’in-18 mak eleita sai xefe suku.
“Eleisaun ne’e povu mak manán, hala’o serbisu kontinua fó buat di’ak ba povu no nasaun,” nia hateten.
Deputadu CNRT, Luis Caldeira, parabeniza ba susesu eleisaun suku iha segunda ronda ne’ebé la’o ho susesu.
Nia hato’o parabéns ba Ministériu Administrasaun Estatál (MAE), administradór munisípiu, administradór postu, CNE no STAE no parte sira seluk, hala’o eleisaun tuir rekomendasaun sira hosi Paralmentu Nasionál, hodi fó susesu ba eleisaun segunda ronda iha fatin hotu la’o di’ak.
“Ha’u rasik horisehik la’o observa iha sentru votasaun iha Dili laran eleisaun la’o di’ak tanba eleitór sira la forma naruk. Parabéns mós ba xefe suku eleitu no ba povu tomak ne’ebé la haree ba kór no partidu, haree tuir de’it kapasidade no lideransa ne’ebé di’ak hodi serbi povu ho fuan no laran,” nia hateten.
Deputada CNRT, Veneranda Lemos, parabeniza feto Timor-leste sira-ne’ebé compete ni eleita iha eleisaun suku tinan 2023 hodi serbisu ho di’ak no konta nafatin ho Parlamentu Nasionál (PN) nia apoiu.
Jornalista : Nelson de Sousa
Editór : Cancio Ximenes
