DILI, 14 novembru 2023 (TATOLI) – Prezidente Repúblika (PR), José Ramos Horta, halo lansamentu ba forsa tarefa interministeriál ba asuntu sosiál no avaliasaun kapitál umanu iha Timor-Leste.
“Husi lansamentu ne’e atu dehan katak nutrisaun ba kosok oan no inan sira isin rua tenke tau atensaun no investe didiak tanba ita haree má nurtisaun sei barak iha ita-nia rain”, Xefe Estadu informa bainhira ramata lansamentu iha City8 Manleuana, ohin.
“Se Governu la tau matan ba polítika ne’e mak labarik sai difisiénsia inteletuál, tanba ne’e tenke tau matan durante iha inan nia kabun laran liuhosi programa nutrisaun saúde nian”, nia afirma.
Iha fatin hanesan, Vise Primeiru-Ministru no Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitaria, Mariano Asanami, dehan ohin halo lansamentu ba forsa tarefa interministeriál ba asuntu sosiál no avaliasaun kapitál umanu iha Timor-Leste.
“Timor-Leste, atu alkansa objetivu nasionál ida-ne’e presiza investimentu ida ne’ebé signifikativu no sustentavél iha área prinsipál tolu, dahuluk mak dezenvolvimentu infansia, daruak nutrisaun no seguransa ai-han no datoluk mak empoderamentu joven”, Assanami hateten.
Diretór Rejionál Banku Mundiál ba Dezenvolvimentu Umanu iha Rejiaun Azia no Pasífiku, Alberto Rodriguez, informa lansamentu Inter-Primeiru taskforce ba asuntu sosiál, ohin, hatudu kompromisu kle’an husi Governu atu harii sosiedade ida-ne’ebé la husik ema ida no investe liu iha nia grupu frajíl sira no membru vulneravél sira husi idade sedu.
“Natureza inter-ministeriál husi taskforce ne’e importante tebes ba ida-ne’e, nia área prioridade dezenvolvimentu sedu ba labarik, nutrisaun no seguransa ai-han no empoderamentu ba foin-sa’e sira-hasoru dezafiu cross-setorial ne’ebé presiza solusaun ida-ne’ebé hanesan liuhosi aprosimasaun koordenada entre ministériu sira”, Alberto Rodriguez konklui.
Jornalista : Feliciadade Ximenes
Editór : Zezito Silva
