Prezidente GMPTL husu xefe suku feto eleita serbí ho responsabilidade

DILI, 14 novembru 2023 (TATOLI)—Prezidente Grupu Mulher Parlamentár Timor-Leste (GMPTL), Deputada CNRT Aliança da Conceição Araújo, husu xefe suku feto eleita iha eleisaun líder komunitária primeira ronda no segundu ronda atu serbí povu ho responsabilidade.
Notísia Relevante: Feto potensiál 18 eleita sai xefe suku
“Primeiru, ha’u hakarak sekunda maluk Deputadu sira-ne’ebé fó parabéns ba maluk sira xefe suku ne’ebé eleitu liuliu ba feto maluk sira, husu feto maluk sira atu nafatin korajen no forsa serbisu iha uma no sosiedade. Serbisu iha ne’ebé de’it, feto tenke forte nafatin,” Prezidente GMPTL ne’e hato’o liuhosi reuniaun plenária PN, tersa ne’e.
Iha reuniaun plenária ne’e, Deputada FRETILIN Cristina Revelo, Maria Angelica Rangel no Deputada CNRT Veneranda Lemos, hato’o mós intevensaun hodi fó apoiu tomak ba xefe suku feto ne’ebé eleita atu ho responsabilidade tomak hodi serbi komunidade no nasaun.
Entretanu, tuir dadus hosi Komisaun Nasionál Eleisaun (CNE, siglá portugés) katak hosi totál suku 452 iha terrítoriu laran, iha suku 442 mak tuir eleisaun suku iha tinan ida-ne’e hodi hili nia xefe suku foun, no suku 10 seluk laiha eleisaun ba xefe suku tanba konsidera hanesan suku foun.
Hosi totál suku 442, kandidatu/a ka lideransa lokál hamutuk ema na’in-2.105 mak rejista, kompostu hosi feto na’in 241 (11%) no mane hamutuk 1.864 (89%) mak kompete iha eleisaun suku 2023 ne’e.
Iha eleisaun suku refere, hosi totál suku 442 ne’e iha suku 271 mak avansa ba segunda ronda no suku 179 mak la avansa tanba iha primeiru ronda hetan ona xefe suku eleitu sira.
Hosi totál suku 442, provizoriamente iha ona rezultadu ne’ebé hatudu katak lideransa feto hamutuk na’in-18 mak eleitu ba xefe suku (4%) mak hanesan munisípiu Aileu iha xefe suku feto eleita hamutuk na’in-haat (4), Ainaro na’in-ida (1), Baucau na’in-haat (4), Bobonaro na’in-ida (1), Covalima na’in-ida (1), Díli na’in-tolu (3), Ermera na’in-ida (1), Manatuto na’in-rua (2) no Manufahi na’in-ida (1).
Kompara ho xefe suku feto períodu liubá, períodu ida-ne’e númeru xefe suku feto ne’ebé eleita tun ho persentajen 1%, tanba iha períodu 2016-2023 xefe suku feto iha ema na’in-21 (5%).
Jornalista : Nelson de Sousa
Editór : Cancio Ximenes

