INTERNASIONÁL, COVALIMA

World Vision enserra atividade relasaun saudavél entre feto-mane iha Covalima

World Vision enserra atividade relasaun saudavél entre feto-mane iha Covalima

Autoridade postu administrativu tolu partisipa serimónia enseramentu implementasaun relasaun saudavél ba futuru livre hosi violénsia ne’ebé implementa durante tinan tolu iha Covalima. Imajen Tatoli.Celestina Teles.

COVALIMA, 14 novembru 2023 (TATOLI)–Organizasaun Internasionál World Vision Timor-Leste, tersa ne’e, enserra atividade implementasaun relasaun saudavél entre feto no mane ba futuru livre hosi violénsia ne’ebé implementa durante tinan tolu iha Covalima.

Word Vision Timor-Leste nu’udar Organizasaun ba asisténsia dezenvolvimentu no advókasia atu servisu ho labarik, família no komunidade hodi rezolve probreza no injustisa, inspira  valór kristaun servisu ho ema vulneravél la haree ba relijiaun, rasa, etniku no jéneru.

“Ami implementa USAID nia atividade foku ba iha relasaun saudavél ba futuru livre hosi violénsia liuliu ba adolsente feto no mane iha relasaun saudavél la iha diskriminasaun ne’ebé ohin halo ona enseramentu,” Diretór Nasionál  World Vision Timor-Leste, Jared Berends, hateten ba jornalista sira, iha salaun AMC, Sukaer Laran, tersa ne’e.

Durante ne’e World Vision implementa atividade saudavél ba futuru livre hosi violénsia iha postu administrative Tilomar, Zumalai no Maucatar ne’e  hala’o servisu hamutuk ho joven sira hodi halo kapasita joven sira oinsá bele enpodera sira-nia aan ho di’ak-liu.

Atividade ne’e finansia hosi USAID ne’ebé World Vision hahú hala’o iha tinan 2020 to’o 2023.

Administradór Munisípiu Covalima, Francisco de Andrade, hateten World Vision implementa nia programa iha Covalima foku ba relasaun saudavél ba futuru livre hosi violénsia ne’ebé ninia implementasaun finaliza no halo ona enseramentu.

“Ita hotu hatene World Vision implementa atividade relasaun saudavél iha munisípiu Covalima ne’ebé implementa programa ho susesu.” nia hateten.

Partisipante Natalino do Rego Tilman reforsa, World Vision implementa atividade relasaun saudavél nia vantajen di’ak, tanba bele redús ona problema igualdade jéneru iha suku sira.

“Programa ne’ebé mak durante ne’e Word Vision hala’o iha munisípiu, ho sira-nia programa bele redús ona problema igualdade jéneru, tanba durante ne’e ita ladún valoriza feto sira,” nia dehan.

Relasaun saudavél no família armónia mai hosi igualdade jéneru feto no mane servisu hamutuk hodi sai hanesan ekipa ida, nune’e bele kria relasaun saudavél iha família.

Munisípiu Covalima, iha nia postu administrativu Fatululik, Fatumea, Suai, Fohorem, Tilomar Maucatar no Zumalai ho nia suku hamutuk 30 no iha aldeia hamutuk 148.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!