iklan

ERMERA

Aldeia haat iha suku Lauana menus bee-moos

Aldeia haat iha suku Lauana menus bee-moos

Xefe suku Lauana, postu administrativu Letefoho, munisípiu Ermera, Miguel Martins. Imajen Tatoli/Osória Marques.

DILI, 15 novembru 2023 (TATOLI)–Xefe suku Lauana, postu administrativu Letefoho, munisípiu Ermera, Miguel Martins, hateten iha suku Lauana ne’e iha aldeia haat (4) mak sei menus bee-moos.

“Iha ha’u-nia suku, aldeia haat hanesan Leubasa, Hatugeo, Alosai ho Liabe bee-moos menus tebes. Bee ne’ebé PNDS instala ne’e, nia kapasidade naton no iha bailoro naruk ne’e bee sei menus. Tanba, PNDS instala fali bee iha foho okos no komunidade hela fali iha foho leten. Agora ne’e hein monta bomba, nune’e komunidade iha aldeia haat atu bele uza.” nia dehan ba Agência Tatoli liuhosi telefónika, kuarta ne’e.

Líder komunitária ne’e dehan, aldeia neen (6) seluk ne’e bee-moos sufisiente hela hodi uza ba nesesidade loro-loron nian, maibé nafatin esforsu hodi oinsá mak abitante seluk bele asesu bee-moos ho di’ak.

Kona-ba eletresidade, nia dehan, eletresidade atinje ona 92% no hela 8% atu abitante sira-ne’ebé hela iha suku Lauana ne’e bele asesu.

“Ha’u dehan 8% ne’e tanba hela aldeia Rebuloi mak seidauk asesu maibé besi-riin harii ona no hein atu instala. Aldeia 10 seluk ne’e asesu ona enerjia eletrisidade. Tanba ne’e, iha IX Governu Konstitusionál ne’e hanoin hodi kontinua halo instalasaun, nune’e abitante iha aldeia refere bele asesu enerjia eletrisidade,” nia dehan.

Entretantu, kona-ba Estrada ne’e kompañia Monte Viana mak halo hela normalizasaun Estrada hosi postu administrativu Letefoho ba suku Lauana ho kilometru rua (2) to’o tolu (3) hanesan ne’e, ne’ebé tama iha kategoria emerjénsia.

Suku Lauana iha aldeia hamutuk 10 mak hanesan aldeia Leubasa, Alosai, Hatugeo, Liabe, Rebou Uslui, Rebou Ainapa, Quirilelo,
Roulu Limiluhi no Grotu, ho abitante hamutuk 3.675 no xefe família iha 800.

Jornalista : Osória Marques

Edit’or     : Cancio Ximenes

iklan
iklan

Leave a Reply

iklan
error: Content is protected !!