DILI, 15 novembru 2023 (TATOLI) – Prezidente Konsellu Administrasaun Autoridade Portuáriu Timor-Leste, Institutu Públiku (APORTIL,I.P), Feliciano da Costa Correia, informa ró-ahi Berlin Ramelau ne’ebé halo operasaun Dili-Oé-Cusse, dezloka ona bá Surabaya-Indonézia hodi halo manutesaun durante fulan ida resin.
“Ita nia ró-ahi Berlin Ramelau ne’ebé halo operasaun rota Dili ba Oé-Cusse para iha fevereiru tuir autoridade reguladór ba sertifikasaun ne’ebé expiradu, nune’e bá halo ona manutensaun iha Surabaya-Indonézia iha 11 novembru, tuku 17:00, lokoraik”, informa Prezidente APORTIL I.P, ne’e ba Agênciaba Tatoli, iha Portu Dili.
Ba manutesaun ró-ahi Berlin Ramelau ne’e Governu prevee iha kontratu manutensaun ho orsamentu liu rihun $390.
Prezidente APORTIL garante katak ró-ahi Berlin Ramelau sei fila hikas iha fulan-dezembru hodi halo operasaun atu tula pasajeiru iha loron bo’ot Santo Natál 2023 no Tinan Foun 2024.
Daudaun, nia dehan ró Berlin Nakroman ho Succes mak kontinua garante operasaun ba rota Dili Oé-Cusse iha Segunda no Kinta-feira.
“Ita iha ró-ahi subsidiáriu hosi Governu nian bainbain tuir nia oráriu fixa ona hamutuk ho operador privadu Succes mós halo hela operasaun hosi Dili ba Oé-Cusse”, katak nia.
Jornalista: Jesuína Xavier
Editór : Florencio Miranda Ximenes
