VIQUEQUE, 15 novembru 2023 (TATOLI)-Serbisu saúde munisípiu Viqueque rejista ema ne’ebé afeta problema má nutrisaun hamutuk 48,2% ekivale ema na’in 379 hosi totál populasaun hamutuk na’in-78,599.
“Iha munisípiu Viqueque, ema má nútrisaun 48,2%, hosi dadús tinan 2022 ne’ebé maka ami rejista,” Xefe departamentu nutrisaun iha serbisu saúde munisípiu Viqueque, Guilhermino Soares Amaral relata ba Agência Tatoli, iha postu Viqueque Vila, kuarta ne’e.
Xefe departamentu ne’e esplika, má nútrisaun hosi 48,2% ne’e kompostu hosi labarik ki’ik tinan lima ba karaik no ema adultu sira.
“Moras sira liga má nútrisaun maka hanesan moras kurasaun, tensaun, raan-midar, liman siin no ain siin; Ida-ne’e liuliu ba ferik no katuas sira tanba sira-ne’e presiza nutrisaun. Tanba ne’e, presiza hahán sira iha nutrisaun di’ak hodi fó isin-di’ak ba ita-nia isin-lolon. Maibé, ba hahán sira-ne’ebé hakahur ho kimíku sei la fó saúdavel ba ita-nia isin,” nia esklarese.
Atu redús má nutrisaun, tuir Xefe Guilhermino Soares Amaral, presiza konsumu hahán sira produtu lokál hodi redús ba má nutrisaun, rejistadu iha Viqueque.
“Grupu agrikultór sira ne’ebé halo to’os, haki’ak animál no haki’ak ikan, sira-ne’e maka bele kontribui ba kombate má nutrisaun. Ita Viqueque ne’e poténsia ba agrikutura, maibé ema prodús maka limitadu liu tanba ne’e maka ita Viqueque ne’e má nutrisaun aas,” Guilhermino hateten.
Nia dehan, agrikultór sira Viqueque badinas tanba Viqueque koñesidu produsaun ba hare, batar no fore hodi bele ajuda Governu lokál iha Viqueque hodi redús ba má nutrisaun ne’ebé agora daudaun sei aas.
Notísia relevante:Horta husu Governu atentu ba kombate má nutrisaun iha TL
Jornalista : Vitorino Loeps da Costa
Editór : Rafael Ximenes de A. Belo
