Vítima hetan tiru iha Baucau halo hela tratamentu iha HNGV
DILI, 15 novembru 2023 (TATOLI) – Vítima Antoneto Sarmento ne’ebé denkonfia tiru husi pesoál intelijénsia iha Suku Gariwai, Postu Adoministrativu Baucau Vila, Munisípiu Baucau, halo hela tratamentu saúde iha Hospitál Nasionál Guido Valadares (HNGV).
“Kona ba vítima ne’ebé mak hetan tiru husi Baucau iha parte kelen nian ne’e, agora daudaun baixa hela iha HNGV iha sirurjia no tuir informasaun ne’ebé iha katak kondisaun agora ne’e, komesa di’ak ona, depois hetan ona tratamentu husi espesialista sira no kondisaun agora komesa di’ak, hein kontinua tratamentu atu alta”, Diretór Klínika iha HNGV, Marcelino Correia, hateten iha nia kna’ar fatin, ohin.
Nia esplika, médiku sira hala’o operasaun duni ba nia tanba hetan tiru iha kelen, depois husi operasaun ne’e médiku sira haree katak kilat musan ne’ebe tiru ba vítima ne’e sai liu no la tama iha laran.
“Médiku sira hamoos no opera, haree tiha depois taka fila fali kanek sira ne’e, maibé kanek ne’ebé nia hetan iha ona mudansa, espera katak semana ne’e nia di’ak ona no bele alta ona”, nia afirma.
Vítima Antoneto Sarmento hetan tiru hosi pesoál intelijénsia iha loron 13 fulan novembru 2023 iha Suku Gariwai, Postu Administrasaun Baucau Vila, Munisípiu Baucau.
Jornalista : Felicidade Ximenes
Editór : Zezito Silva
