COVALIMA, HEADLINE

Bailoro naruk: AMC monta tanke bee hodi distribui ba populasaun ne’ebe falta

Bailoro naruk: AMC monta tanke bee hodi distribui ba populasaun ne’ebe falta

Liña ministeriál hala'o enkontru hodi deside fo apoiu bee-moos ba komunidade afeitada husi bailoro naruk. Imajen Tatoli/ Celestina Teles.

COVALIMA, 16 novembru 2023 (TATOLI) – Administrasaun Munisípiu Covalima (AMC), Autoridade Protesaun Sivíl hamutuk ho liña ministeriál deside monta tanke bee-moos litru 5000 ba komunidade ne’ebé la asesu rekursu ne’e tanba kauza husi bailoro naruk.

Populasaun ne’ebé falta bee-moos mak iha aldeia Matai no Kunain iha suku Matai, iha postu administrativu Maucatar no iha aldeia Lokeu iha suku debos, postu Suai.

“Timor-leste enfrenta situasaun bailoro naruk ne’ebé afeta ba ita-nian komunidade sira asesu bee-moos tanba maran. Ohin, ita realiza enkontru atu buka soluasaun hodi distribui bee-moos ba sira”, Diretór Servisu Munisipál ba Protesaun Sivíl, Jestaun Risku Dezastre Naturál, Quintino da Costa, hateten iha salaun Coved Bairru Costa, ohin.

Nia relata katak rezultadu enkontru hamutuk ho liña Ministériá deside mekanismu fó apoiu bee-moos ba komunidade, liuhusi monta tanke bee litru 5000 iha fatin públiku, nune’e hafasil ba sira bele asesu bee-moos.

Komandante Autoridade Protesaun Sivíl Covalima, Inspetór Xefe Flávio Mendes, hatutan katak liña ministeriál buka solusaun hodi fornese bee-moos ba komunidade, tanba impaktu husi bailoro. “Rezultadu enkontru hatudu katak ita fó apoiu bee-moos tuir ita-nian fasilidade”, dehan.

Aleinde falta bee, Governu Timor-Leste kolabora ho Organizasaun Nasaun Unida ba Programa Alimentár Mundiál (WFP, sigla inglés) inklui Organizasaun Alimentasaun no Agrikultura (FAO, sigla inglés) halo ona alerta urjente ba seguransa ai-han ne’ebé hatudu risku aas tanba falta ai-han kauza hosi El Niño la apár iha kontestu dependénsia agrikultura iha rai-laran, ne’ebé depende de’it ba udan-been.

Ho kondisaun nivel ai-han la seguru ne’ebé aumenta, Timor-Leste hatudu ona sinál klaru katak bailoro naruk iha munisípiu 12, hosi munisípiu 14 bazeia ba Índise Bailoro Konjunta, prodús hosi Governu Timor-Leste no FAO.

Nune’e mós, nasaun ne’e daudaun hasoru hela posibilidade bailoro naruk aas kauza hosi El Niño ho previzaun udan-been ki’ik to’o iha inísiu tinan 2024, ne’ebé sei afeta gravemente ba setór agríkola.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!