DILI, 16 novembru 2023 (TATOLI) – Diretór Jerál Unidade Projetu iha Ministériu Saúde, Vitor Soares Martins, hateten konstrusaun andar lima no Unidade Kuidadu Intensivu Kardiolojia (ICCU), iha Hospitál Nasionál Guido Valadares (HNGV) nia progresu atinje ona 1.8%.
“Durante ne’e ita halo ona lansamentu ba pediatria andar lima no ICCU iha HNGV ne’e iha inísiu fulan janeiru 2023 nian, depois konstrusaun ba pediatria andar lima ne’e, foin daudauk iha fulan setembru mak halo lansamentu ba ai-rin nian ne’ebé agora daudaun nia progresu atinje ona 1.8%”, Vitor Soares Martins, informa iha nia kna’ar fatin Caicoli, ohin.
Nia afirma, iha loron 25 fulan novembru ida-ne’e materiál konstrusaun barak mak sei to’o iha portu tibar ligadu ho konstrusaun pediatria andar lima no ICCU nian iha HNGV.
“Ha’u hanoin katak materiál fisika sira ne’e to’o, ita sei hetan progresu ne’ebé di’ak liu kompara ho agora daudaun ne’e”, nia hateten.
Konstrusaun pediatria andar lima no ICCU iha Hospitál Nasionál Guido Valadares (HNGV) prevé ho montante orsamentu hamutuk miliaun $9.3 no konstrusaun refere ho durasaun tinan rua, hahú 2023-2025 ne’ebé kaer husi kompaña China Civil Engineer Constrution Coperation(CCECC).
Jornalista : Felicidade Ximenes
Editór : Zezito Silva
