DEFEZA, HEADLINE

Indonézia entrega prezidénsia reuniaun Ministru Defeza ASEAN ba Laos

Indonézia entrega prezidénsia reuniaun Ministru Defeza ASEAN ba Laos

Ministru Defeza hosi nasaun membru ASEAN inklui Ministru Defeza no Ministru Defeza hosi India, Estadu Unidu Amérika, Rúsia, Korea Súl, Japaun, Austrália no Ministru Nova Zelándia, partispa iha reuniaun altu nível entre Ministru Defeza ASEAN Plus ne’ebé maka hala’o iha sentru Konvensaun Jakarta, kinta (16/11) ohin. Imajen Tatoli/Natalino Costa.

JAKARTA, 16 novembru 2023(TATOLI) – Ministru Defeza Indonézia Prabowo Subianto, reprezenta Governu Indonézia entrega prezidénsia enkontru Ministru Defeza ASEAN ba Laos atu lidera fali reuniaun Ministru Defeza nasaun organizasaun Sudeste Aziátiku ( ASEAN,sigla portugés) iha tinan oin.

Reuniaun altu nivél entre Ministru Defeza ASEAN ba dala-17 ne’ebé hala’o iha Jakarta Indonézia durante loron rua, hahú hosi 15 to’o 16 novembru, ho tema mak ‘Peace Prosperity And Security’.

Hafoin prezide tiha reuniaun Ministru Defeza ASEAN ba dala-17, Prabowo Subianto halo kedan prosesu re-entrega prezidénsia ba enkontru Ministru Defeza ASEAN ba iha Ministru Defeza Laos Jenderál Chansamone Chanyala, hodi lidera fali enkontru Ministru Defeza ASEAN iha 2024.

Reuniaun altu nivél diferente tanba inklui mós ho reuniaun Ministru Defeza ASEAN Plus ba dala-10 ne’ebé partisipa hosi Ministru Defeza India, Rusia, Estadus Unidus Amerika, Japaun, Korea Súl no Ministru Defeza hosi Xina.

Hafoin remata reuniaun altu nivél Ministru Defeza Prabowo Subianto, hateten Indonézia realiza reuniaun entre Ministru Defeza nasaun membru ASEAN ba dala 17 no Ministru Defeza ASEAN Plus ba dala-10, atu partilla ba malu kona-ba situasaun seguransa no Defeza iha rejiaun ASEAN kontinua sólidu nafatin atu ba oin nasaun membru ASEAN sira buka tulun malu hodi apoiu  malu.

Nia dehan, reuniaun entre Ministru Defeza ASEAN nu’udar reuniaun anuál no importante tebes atu kontinua kria relasaun amizade, prosperidade entre komunidade ASEAN hodi garantia katak situasaun iha rejiaun ASEAN to’o agora mantein iha estabilidade, pás no prosperidade nia laran.

“Iha reuniaun Ministru Defeza ASEAN ne’e, ita mós aprova hodi aseita Timor-Leste ninia partisipasaun iha enkontru Ministru Defeza ASEAN nu’udar nasaun ho estatutu observadór”, Prabowo Subianto hateten ba jornalista liuhosi konferénsia imprensa ne’ebé halo iha Sentru Konvesaun Jakarta, kinta ne’e.

Governante ne’e hateten, durante reuniaun Ministru Defeza ASEAN koalia mós kestaun situasaun iha Palestina no Israel, ASEAN afirma pozisaun hodi husu ba nasaun sira ne’ebé iha poder atu hakotu lalais funu,

Parabowo hatutan liu tán katak durante reuniaun minstru defeza ASEAN koalia mós kona-ba membru nasaun ASEAN nian, atu ba oin servisu hamutuk hodi fó seguransa iha tasi nian kontra terorista, fó ajuda umanitaria ba vítima sira iha funu, atendimentu ba vítima sira ne’ebé hetan dezastre natural, operasaun manutensaun pás, asisténsia médika no atu proteze krime sibernétika iha rejiaun liuliu nasaun membru ASEAN no enkontru Ministru Defeza ASEAN koalia liu ba kestaun igualidade jéneiru iha kontestu feto iha pás.

“Iha enkontru reuniaun Ministru Defeza ASEAN ami mós halo nota aseitasaun ida mak oinsá nasaun sira ne’ebé iha influénsia atu hakotu funu iha Palestina tanba kestaun umánitaria ne’ebé kauza ema barak mak mate ona no oinsá membru nasaun ASEAN atu kopera hodi fó seguransa ba iha tasi”, nia afirma.

Iha fatin hanesan, Ministru Defeza Laos, Jenderál Chansamone Chanyala, hateten Laos mak tinan oin lidera fila fali enkontru Ministru Defeza ASEAN.

“Ha’u hakarak kongratula de’it ba nasaun membru ASEAN nian ba Ministru Defeza Indonézia Prabowo Subianto ne’ebé lidera reuniaun Ministru Defeza ASEAN ho di’ak tebes no ohin entrega ona mai Laos hodi tinan oin atu lidera fali enkontru ida-ne’e no ida ami agradese tebes”, nia dehan.

Prabowo Oferese Gala Dinner ba Ministru Defeza ASEAN nian

Hafoin reuniaun altu nível, uma-na’in oferese Gala Dinner, no Prabowo hato’o agradesimentu ba nasaun membru ASEAN no  Ministru Defeza ASEAN Plus sira hotu nian delegasaun, tanba maske hosi dook maibé bele partisipa reuniaun Ministru Defeza ASEAN ba dala-17 reuniaun Ministru Defeza  ASEAN Plus nian ba dala sanulu.

“Ha’u nia agradesimentu wain ba ita bo’ot sira ho Gala Diner ida-ne’e ita kontinua haforsa no hametin ita-nia kooperasaun ne’ebé nasaun membru ASEAN iha ona kontinua hamutuk hasoru kualker ameasa sira ne’ebé rejiaun ASEAN sei hasoru”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!