DILI, 16 novembru 2023 (TATOLI) – Diretór Ezekutivu Juventude Inovativu , Filipe de Jesus hateten joven sira presiza sakrifika aan hodi bele kontribui ba dezenvolvimentu nasionál.
Filipe de Jesus hato’o lia hirak ne’e iha semináriu ho tema “Atu haforte nasinalismu no demokrasia iha Timor-Leste” hodi hanoin hikas sakrifísiu no foinsa’e sira ne’ebé oferese sira-nia vida iha masakre Santa cruz Dili iha loron 12 fulan-novembru 1991.
Nia hateten masakre 12 novembru 1991 rezulta joven barak maka hetan detensaun, torturasaun no kastigu husi militár Indonézia hodi luta ba ukun rasik aan.
“Joven sira agora tenki sakrifika sira-nia aan ba dezenvolvimentu, foka ba asuntu ida hodi bele hetan susesu. Hanesan ezemplu bele kria kooperativa iha agrikultura ka hahú negósiu ki’ik,” nia hateten ba TATOLI, iha Manleuana Dili.
Diretór ne’e hateten espíritu nasionalismu ejize sakrifísiu hosi foinsa’e sira hodi dedika aan tomak ba sosiedade, kreda no nasaun hodi hametin pas no estabilidade hodi kontribui ba dezenvolvimentu nasaun nian.
Maibé, oras ne’e, foinsa’e barak mak uza sala sira-nia direitu iha era demokrasia, tanba seidauk konsiente katak demokrasia mos esbelese lei no regulamentu atu regula ninia sidadaun iha sosiedade nia leet.
Iha fatin hanesan, partisipante semináriu Josefina Bakita, semináriu ne’e importante atu bele aprende lisaun ruma hodi kontribui ba dezenvolvimentu nasaun nian.
“Hau nu’udar foinsa’e iha papel ida importante hodi partisipa iha dezenvolvimentu nasionál. Iha semináriu hau bele aprende oinsá investe hau-nia aan ba iha edukasaun no bele sai autór ba dezenvolvimentu,” nia hateten.
Jornalista: Jesuína Xavier
Editor: Florencio Miranda Ximenes
