iklan

DEFEZA, HEADLINE

Ministru Defeza TL husu Ministru Defeza Nasaun Membru ASEAN kria pás no estabilidade iha Rejiaun

Ministru Defeza TL husu Ministru Defeza Nasaun Membru ASEAN kria pás no estabilidade iha Rejiaun

Ministru Defeza hosi nasaun membru ASEAN inklui Ministru Defeza no Ministru Defeza hosi India, Estadu Unidu Amérika, Rúsia, Korea Súl, Japaun, Austrália no Ministru Nova Zelándia, partispa iha reuniaun altu nível entre Ministru Defeza ASEAN Plus ne’ebé maka hala’o iha sentru Konvensaun Jakarta, kinta (16/11) ohin. Imajen Tatoli/Natalino Costa.

JAKARTA, 16 novembru 2023(TATOLI) – Ministru Defeza Donaciano Costa Gomes ‘Pedro Klamar Fuik, husu ba Ministru Defeza Nasaun Membru ASEAN inklui nasaun hirak ne’ebé hola parte iha reuniaun ne’e atu hamutuk hodi kria pás no estabilidade iha rejiaun ASEAN hodi hasoru tentativa sira ne’ebé fó ameasa ba nasaun sira iha ASEAN.

“Mai ita hothotu hamutuk hodi kria pás no estabilidade iha rejiaun ASEAN”, Klamar Fuik dehan iha nia intervensaun durante reuniaun Ministru Defeza ASEAN Plus ne’ebé hala’o iha Sentru Konvensaun Jakarta, kinta ne’e, ohin.

Klamar Fuik, agradese ba Indonézia no nasaun membru nasaun Sudeste Aziátiku (ASEAN, sigla inglés), tanba bele aseita no simu Timor-Leste hodi partisipa iha enkontru Ministru Defeza ASEAN ba dala-17 inklui reuniaun  entre Ministru Defeza ASEAN Plus nian iha Jakarta Indonézia ho estatutu nudar nasaun observadór.

Ministru lori Estadu Timor-Leste nia-naran agradese ba Ministru Defeza Indonézia Prabowo Subianto, ne’ebé prezide reuniaun altu nivél Ministru Defeza ASEAN ba dala -17 no reuniaun Ministru Defeza Plus tinan ne’e, iha Jakarta ho di’ak tebes.

“Hakarak agradese ba Ministru Defeza Indonézia Prabowo Subianto ne’ebé simu delegasaun Ministru Defeza Timor-Leste ho di’ak, hahú hosi atendimentu ospitalidade durante estadia iha Jakarta hodi tuir reuniaun ministru Defeza ASEAN ba dala -17 no reuniaun Ministru Defeza Plus ne’ebé halao iha Jakarta tinan ne’e”, nia revela.

Iha fatin hanesan, Ministru Defeza Indonézia Prabowo Subianto, husu mós ba nasaun membru ASEAN atu evita konflitu iha rejiaun ASEAN no hametin pás atu ema hotu iha rejiaun ASEAN bele moris iha hakmatek no prosperu nia-laran.

Nasaun sira ne’ebé mak hola parte iha reuniaun altu nivél entre Ministru Defeza ASEAN Plus iha kinta (16/11) mak nasaun sanulu hosi ASEAN  hanesan Ministru Defeza hosi India, Estadus Unidus Amerika, Rusia, Korea Súl, no Ministru Nova Zeladia, Japaun no Australia.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!