DILI, 16 novembru 2023 (TATOLI)–Diretór Jerál Ministériu Solidariedade Sosiál no Inkluzaun (MSSI), Florêncio Pina, hateten orsamentu ba programa Bolsa da Mãe Jerasaun Foun (BdMJF) la prevee iha Orsamentu Jerál Estadu (OJE) 2024.
Notísia Relevante: Jullu 2023: DNPDED rejista benefisiáriu Bolsa da Mãe Jerasaun Foun 47.839
“Ha’u atu informa de’it katak iha Orsamentu Jerál Estadu 2024 MSSI nian la tau ona osan ba bolsa da mãe jerasaun foun. Maibé, ami-nia servisu ba programa bolsa da mãe jerasaun foun kontinua la’o to’o fulan dezembru tinan ne’ e. Ida-ne’e hateten katak prosesu pagamentu la’o hela tanba iha ona nia orsamentu rasik ne’ebé Governu aloka ona,” Florência Pina hateten ba jornalista sira hafoin halo konferénsia imprensa, iha edifísiu MSSI Caicoli, kinta ne’e.
Nia dehan, programa refere la kontinua mak apoiu hosi Departement of Foreign Affairs and Trade (DFAT) Austrália mós labele kontinua, tanba sira apoiu ba programa ne’e no implementa ho objetivu rua mak ida mak redús ki’ak, hadi’a má nutrisaun no reforsa ekonómia família nian.
“Tanba ne’e, bainhira taka ne’e ami la’o tuir de’it tanba ami ne’e hein implementa de’it,” nia dehan.
Nune’e, pagamentu ba aplikante no benefisiáriu kada fulan ba tinan 2023, hosi fulan-janeiru to’o setembru hamutuk 38.202, hosi ne’e totál benefisiáriu ba programa ne’e hamutuk 47.208 no hosi ne’e inan isin-rua iha 4.175, labarik idade 0-6 hamutuk 42.881 no labarik ho defisiénsia iha 151.
“Benefisiáriu ne’e ita aloka ona osan $7.240,570 hodi selu no prosesu ne’e la’o hela tanba ita-nia TPAY Telekomsel ho Mosan Telemor mak responsabiliza ba pagamentu ne’e,” nia dehan.
Jornalista : Osória Marques
Editór : Cancio Ximeens
