Papel setór privadu importante kontribui ba dezenvolvimentu
DILI, 16 novembru 2023 (TATOLI) – Ministru Obras Públika (MOP), Samuel Marçal, hateten setór privadu nasionál sira-nia papel importante atu kontribui ba dezenvolvimentu sira iha Timor-Leste.
“Ohin ita halo enkontru no hahú re-organiza fali ita-nia setór privadu nasionál sira tanba setór privadu nasionál hanesan setór ida ne’ebé importante tebes no sei implementa no ezekuta planu Governu nian”, Samuel Marçal salienta hafoin konklui enkontru ho setór privadu sira iha MNEK, ohin.
Nia dehan, setór privadu mak tenke kria empregu ba joven sira, sira mak tenke aselera dezenvolvimentu nasionál.
“Tanba ne’e mak husi parte Governu haree katak setór privadu hanesan setór ida ne’ebé mak importante, entaun ohin ha’u buka atu re-organiza fali sira hotu hodi rona tok sira-nia preokupasaun kona-ba saida mak atu ita bele rezolve hamutuk atu nune’e sira bele la’o ba oin”, nia informa.
Tuir nia, setór privadu sira ne’ebé mak partisipa enkontru ne’e besik 300, hirak ne’e mai husi territóriu nasionál maibé maioria Dili, espera katak ba oin ne’e bele servisu hamutuk hodi lori dezenvolvimentu ba oin.
Iha fatin hanesan, Prezidente Kamara Komérsiu Indústria Timor-Leste (CCITL), Jorge Serano, agradese ba Governu tanba bele halibur hamutuk setór privadu hotu atu tau hanoin hodi lori setór privadu sira ne’e ba futuru.
“ohin setór privadu sira ne’ebé mak hamahan iha CCITL, mai hotu iha ne’e atu hato’o direta preokupasaun sira ne’ebé mak durante ne’e hasoru tanba ita hotu hatene katak setór privadu iha Timor-Leste ne’e maioria halo konstrusaun sivil, entaun problema ne’ebé hasoru durante ne’e oinsa bele rezolve nune’e bele lori dezenvolvmentu ne’e ba oin ho di’ak”, nia konklui.
Jornalista : Felicidade Ximenes
Editór : Zezito Silva
