iklan

BOBONARO, HEADLINE, KÁMBIU, MUNISÍPIU, POLÍTIKA

Relasaun família-kultura TL ho NTT  laiha fronteira

Relasaun família-kultura TL ho NTT  laiha fronteira

Lansamentu Ofisiál festivál fronteira 2023, Interkambiu kulturál ba hametin rekonsiliasaun. Imajen mídia SEAK.

BOBONARO, 16 novembru 2023 (TATOLI) – Ministru Joventude, Desportu, Arte no Kultura, Nélio Isaac Sarmento, hamutuk ho autoridade munisípiu Bobonaro no Bupati Kabupaten Belu, Nusa Tenggara Timur (NTT), Indonézia, kuarta ne’e lansa ofisialmente abertura festivál fronteira 2023 ho tema ‘Interkámbiu Kulturál ba hametin Rekonsiliasaun’ ne’ebé realiza iha postu administrativu Maliana, munisípiu Bobonaro.

Minstru Nélio Isaac Sarmento, hateten eventu ne’e importante tebes tanba bele halo timoroan sira hasoru malu, maske iha pasadu sira fahe malu tanba diferente pozisaun polítiku to’o hafahe fronteira, maibé relasaun família no kultura laiha fronteira, tanba hela iha illa ida de’it.

Notísia relevante: Festivál Fronteira 2023: Grupu Artezenatu promove sasán kulturál iha Maliana

“Se iha illa ida de’it, ita atu dehan relasaun família forte liu, duké ita hakarak halo separasaun entre ida ba ida, tanba ne’e prezensa ita-boot sira hotu, agradese, mai ita hahú neineik-neneik hodi hametin liután fronteira idak-idak nia no hametin liután relasaun entre rai rua iha ámbitu familia. Rai ida-ne’e ita hotu nia, rai ida-ne’e imi-nia, mesmu ita iha opsaun polítika diferente, maibé ita Timor ida de’it, ohin loron ita ko’alia ba malu, keta haluha jerasaun tuir mai sei hametin nafatin,” nia hateten.

Nia afirma, liuhosi eventu ne’e atu timoroan hotu bele troka hanoin no buka hatene loloos kona-bá Timor ninia orijinalidade hosi kultura ne’ebé hametin ona iha illa ida-ne’e.

Tuir nia, timoroan sira iha país rua ne’e tenke simu malu, tanba tuir deklrasaun Papa Francisco katak, fraternidade entre ema ho ema tenke sai ema hotu nia mehi hodi hadi’ak mundu.

Sekretáriu Estadu Arte no Kultura, Jorge Cristovão, reforsa IX Governu Konstituisionál tau prioridade ba programa ne’e hodi hametin liután relasaun kultura timoroan sira-ne’ebé iha nanis ona dezde bei-ala sira-nia tempu.

“Ohin povu hosi nasaun rua mai iha area fronteira, mai hamutuk iha festivál fronteira ida-ne’e, atu hatudu hamutuk hatudu no prova katak tempu no funu sei la halakon identidade kulturál ne’ebé mak identifika ona dezde ita hahú moris iha mundu ida-ne’e, ita ko’alia kona-bá kultura sei laiha fronteira,” nia hateten.

Festival fronteira ne’e loke ho atvidade Welcome Diner ne’ebé anima hosi banda muzika Kore-Metan, solo hosi Izu Mausoko ho muzika Welcome to Timor-leste, Bidu tebe likurai, dansa kombinasaun hosi Sangar St António, Timor Furak, Wehale Leijavál fronteira ne’ebé hetan partisipasaun másimu hosi komunidade postu administrativu Maliana no seluk tán.

Notísia relevante: PNTL ho F-FDTL preparadu asegura  festivál kulturál fronteira

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!