DILI, 16 novembru 2023 (TATOLI) – Sekretariu Estadu Formasaun Profisionál no Empregu (SEFOPE), Rogerio Araújo Marçal, klarifika kandidatu traballadór timoroan, ne’ebé kompete ba vaga no teste atu ba servisu iha Austrália ne’e empreza australiana sira mak halo direita liuhosi via online, la’ós SEFOPE mak halo.
Sekretáriu Estadu ne’e hateten asuntu ne’e relasiona ho públiku kestiona kona-bá timor-oan hamutuk 55.000 kompete vaga, maibé selesionadu mak kandidatu traballadór na’in-14.000, hodi ba teste liu mak ema na’in-2.500, no na’in- 800 mak liu no agora tama ona iha sistem hein, bainhira empreza sira bolu atu bá servisu.
“Agênsia Austráliana-sira mak halo screening ba iha abilidade no kompeténsia. Diresaun Nasionál Empregu Estrangeiru SEFOPE laiha ema ida hodi halo intervensaun”, klarifika Sekkertáriu Estadu ne’e iha kna’ar fatin, Caicoli-Dili.
Nia esplika kandidatu rihun haat iha sistema baze dadus SEFOPE nian no rihun 11 husi 2016 no 2017 nia naran sei taka sai iha kada munisípiu.
“Se sira nia naran taka sai iha munisípiu, SEFOPE sei loke teste ba sira. Se sira liu iha teste, empregadór estranjeiru sira mak hili hodi ba serbisu iha rai-li’ur”, nia esplika.
Sekretáriu Estadu ne’e mensiona katak vaga online disponível bo’ot liu ba iha munisipiu Dili hamutuk 9.525, Baucau 7.800, Ermera 6.000-resin tuir mak Bobonaru no seluk tan, maibé ne’e selesaun no teste husi empregadór.
Nune’e, Sekretáriu Estadu ne’e dehan sai ukun na’in tenke servisu ho fuan no laran hodi servi povu no la haree ba kór partidaria.
Nia hatete asuntu ne’e hodi klarifika informasaun ne’ebé publika iha rede sosiál Facebook katak SEFOFE ukun hili kór partidu atu haruka nia ema sira ba servisu iha rai li’ur.
“Ha’u la’ós ema foun iha SEFOPE, atu estabelese empregu iha rai li’ur Austrália, ha’u ema inisiadór ne’ebé estabelese iha 2012, hamutuk ho SEFOPE Bendito Freitas. Ha’u servi ba nasaun servi ba povu ida ne’e. Ita labele haree ba kór partidu ka relijiaun. Ukun atu servi ne’e povu nian”, nia afirma.
Jornalista: Jesuína Xavier
Editór : Florencio Miranda Ximenes
