VIQUEQUE, 17 novembru 2023 (TATOLI)—Ministériu Agrikultura Pekuária, Peska no Floresta (MAPPF), sesta ne’e, distribui berro fiberglass peska unidade 19 inklui mákina ba grupu peskadór sira iha munisípiu Viqueque.
Ministru Agrikultura, Pekuária, Peska no Floresta, Marcos da Cruz, hateten, IX Governu tau importánsia ba área peska nune’e fasilidade ne’ebé oferese ba peskadór sira hodi uza halo peska ikan iha tasi tanba Governu hakarak peskadór sira hasa’e produsaun ikan.
“Ita atu aumenta kuantidade ikan, peskadór sira tenke tama tasi laran hodi kaer ikan. Tanba ne’e, Governu fasilita peskadór sira hodi imi utiliza. Ami haree katak imi uza berro ho ai maka tama tasi,” Ministru dehan hafoin ramata distribuisaun, iha kampu futeból Ailenbata, suku Babulu.
Governante ne’e nota katak, peskadór sira iha vontade tebes kaer ikan, maibé fasilidade ladún di’ak tanba ne’e Governu iha inisiativa apoia.
“Bainhira imi bá kaer ikan no ikan iha tenke organiza malu hodi bele fa’an to’o iha Dili nune’e imi bele hetan osan hodi hadi’a imi-nia moris nu’udar peskadór,” Ministru fó hanoin.
Notísia relevante : Governu sei distribui bero fiberglass ba peskadór sira iha Viqueque
Biban ne’e, nia husu ba grupu peskadór atu labele fa’an berro ne’ebé Governu oferese tanba ne’e fasilidade Estadu nian.
“Sé maka koko atu fa’an sei responsabiliza. Ha’u husu ba benefisiáriu sira tenke uza berro ne’e ho di’ak,” nia bolu atensaun.
Iha fatin hanesan, Administradór postu Uatulari, Manuel do Rosário, agradese ba Governu liuhosi MAPPF ne’ebé oferese ona berro ba peskadór sira.
“Ha’u enkoraja peskadór sira hodi bele hala’o atividade iha tasi hodi ka’er ikan. Nune’e, ha’u hakarak peskadór tenke kuidadu ho fasilidade sira-ne’e tanba Governu fó hodi hatudu rezultadu ba família sira,” nia tenik.
Nune’e mós, Koordenadór Grupu Laka Teba-Teba, suku Babulu, postu Uatulari, Oscar Lemos Leão Carlos Lopes, haktuir, baibain sira tama tasi ho berro ai maka dada ikan, maibé kondisaun berro ladún di’ak ona.
“Maibé, ohin ami simu ona berro hosi Governu, ami sente kontente no agradese ba Governu ne’ebé distribui berro ba ami. Ho apoia ida-ne’e, ami sei garante hasa’e produsaun ikan iha postu Uatulari no ami sei kuidadu berro ne’ebé ami simu,” nia hato’o
Grupu Laka Teba-Teba ninia membru hamutuk na’in-ualu, ne’ebé grupu sei organiza malu hodi ba kaer ikan hodi fa’an ba populasaun.
MAPPF apoia berro ba grupu peskadór 19 hosi postu!tolu hanesan Viqueque Vila, Uatucarbau no Uatulari, ne’ebé kada grupu simu berro ida, mákina ida, tali no roupa tasi nian.
Serimónia distribuisaun ne’e akompaña mós hosi Sekretáriu Estadu Peska, Domingos da Conceição dos Santos, Autoridade lokál, Komandante Polísia Nasionál Timor-Leste (PNTL) munisípiu Viqueque, Superentendente, João da Costa, inklui entidade relevante seluk.
Jornalista : Vitorino Lopes da Costa
Editora : Julia Chatarina
