SEKOMS inaugura Sentru Informasaun Suku iha Nahareca
VIQUEQUE, 17 novembru 2023 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, inaugura Sentru Informasaun Suku Nahareca, Postu Administrativu Ossu, Munisípiu Viquque.
“Programa ne’e la ses hosi programa ne’ebé VIII Governu halo ho naran Naroman ba Suku, maibé muda de’it mak nia naran oituan, katak sentru informasaun suku, objetivu hanesan de’it lori informasaun ba povu sira iha área rurál”, Expedito dehan iha nia intervensaun, iha Nahareca, ohin.
Nia dehan, Governu da-sia ne’ebé lidera hosi Primeiru-Ministru Kay Rala Xanana Gusmão tau importánsia ba informasaun atu povu sira bele asesu iha área rurál.
Tuir nia, Governu ida-ne’e lori mós liña internet besik liu ba komunidade sira iha nivél rurál atu asesu informasaun sira iha rai laran no rai liur.
“Sentru informasaun iha ona, husu ba inan aman no komunidade sira hotu iha ne’e, iha tempu loraik bele hakat mai sentru ne’e hodi asesu informasaun ne’ebé iha”, nia dehan.
Expedito hateten, funsionáriu 15 ne’ebé servisu iha sentru informasaun ne’e sei hetan formasaun hosi Sentru Formasaun Teknolojia Komunikasaun (CEFTEC) iha Dili ou formadór sira sei mai fó direita formasaun ba funsionáriu hirak ne’e.
Funsionáriu ne’ebé servisu iha sentru informasaun ne’e hamutuk ema 15 ne’ebé sei servisu hodi rekolla informasaun kona-ba atividade no akontesimentu sira iha Suku Nahareca atu publika ba públiku liuhosi pájina facebook ne’ebé iha ona.
Fasilidade sira ne’ebé apoia iha sentru informasaun mak Laptop ida, komputadór ida no kámera foto ho matka Canon ida.
Iha okaziaun ne’e, Administradór Postu Administrativu Ossu, Sebastião Fereira agradese ba Governu da-sia ne’ebé kontinua nafatin programa ne’ebé Governu anteriár husik hela.
“Programa ne’e di’ak tebes, hosi Governu ida ba Governu seluk kontinua nafatin, ida-ne’e mak dezenvolvimentu, fiar katak ho fatin ida-ne’e bele fornese informasaun ba komunidade iha Nahareca”, Administradór dehan.
Administradór husu husu ba estrutura ne’ebé servisu iha sentru informasaun atu servisu ho seriedade hodi fornese informasaun ba komunidade.
“Husu ita-boot sira atu servisu ho seriedade hodi servi ita-nia bovu ida-ne’e, liuhosi informasaun Governu nian ba ita-nia povu sira atu hatene kona-ba situasaun rai laran no atividade Governu nian”, nia afirma.
Programa ne’e estabelese ona iha suku 26 iha territóriu laran tomak no tau ona ekipamentu balun, maibé iha fatin balu to’o agora seidauk utiliza.
Tanba ne’e, IX Governu kria ona ekipa ida atu ba halo observasaun, karik identifika balun mak konklui ona sei halo inaugurasaun.
Programa sentru informasaun Suku ne’e iha mós diálogu komunitária atu komunidade bele rona programa ne’ebé IX Governu atu halo no Governu mós bele rona problema no difikuldade saida maka komunidade sira enfrenta.
Governu kria Sentru Informasaun Suku ho objetivu atu promove koñesimentu sidadaun nian kona-ba notísia atualidade, hothotu tantu nasionál no internasionál.
Expedito husu ba komunidade Suku Nahareca hotu atu hakbesik aan ba Sentru Informasaun Suku (SIS) ne’ebé iha atu asesu ba informasaun.
“Husu ba inan aman sira, alin estudante sira, programa Sentru Informasaun Suku ne’e atu lori internet mai hamutuk ho povu, entaun hakbesik aan mai sentru informasaun ne’e atu asesu ba Wi-Fi gratuita ne’ebé iha hodi asesu informasaun kona-ba rai laran nian no rai liur nian iha google no yutube, alin eskola sira atu buka servisu no akompaña mundu karik bele asesu iha internet ne’ebé iha ona Sentru Informasaun Suku” hatete Expedito iha Nahareca, sesta ne’e.
Jornalista: Hortencio Sanchez
Editór : Zezito Silva
