BAUCAU, 17 novembru 2023 (TATOLI) – Serbisu Munisipál Saúde Baucau (SMSB) realiza atividade diagnóstika partisipativu relasiona ho programa saúde família iha suku Tirilolo, postu Baucau Vila.
Koordenadór programa saúde família SMSB, Veronimo Ornai, esplika, atividade refere hala’o tanba relata kauza saúde família nian ne’ebé antes tama-sai uma hodi sosializa no fó sai hikas rezultadu ba autoridade suku no instituisaun relevante inklui komunidade sira iha suku refere.
“Atividade ne’e ami fó-sai problema saúde ne’ebé durante ne’e ami vizita nune’e fó ideia hamutuk hodi solusiona problema ne’ebé komunidade hasoru,” Koordenadór programa saúde família SMSB hateten iha Vila Antiga, sesta ne’e.
Problema ne’ebé komunidade hasoru interligadu hanesan individuál, família, ambientál, sosiál, kulturál no ekonomia liuliu saniamentu no bee-moos nune’e liuhosi diskusaun sei informa ba malu nune’e kada institusaun bele rezolve tuir responsabilidade.
Bainhira problema hirak-ne’e identifikadu sei bele rezolve liuhosi pedidu autoridade komunitária ba autoridade administrasaun munisipál nune’e bele orienta instituisaun relevante seluk hanesan serbisu munisipál bee no saniamentu.
“Pedidu sira-ne’e bele relata ba autoridade hodi rezolve emerjensiamente depende ba programa planu asaun anuál,” Veronimo Ornai akresenta.
Programa saúde família, SMSB deteta suku Tirilolo iha uma-kain 100-resin mak seidauk iha saniamentu hanesan sitina nune’e liuhosi atividade refere husu autoridade suku hamutuk komunidade atu konstrui tuir kbiit ekonomia família nian.
Xefi suku eleitu atuál xefi aledeia Betulale, Elvino Freitas Belo, hateten, suku Tirilolo iha área urbana no rurál nune’e aldeia haat iha área rurál mak purvolta uma-kain 100-resin seidauk iha sintina tanba ne’e bainhira simu tiha pose sei esforsu atu rezolve nune’e suku refere bele livre hosi área la soe foer arbiru (ALFA).
“Hau-nia planu depois simu pose sei kria enkontru atu kontinua identifika uma-kain ne’ebé laiha sintina atu rezolve,” Elvino Belo hateten.
Suku Tirilolo hamutuk aldeia neen kompostu Betulale, Lutumutu, Lialailesu, Parlamentu, Caisido no Osso-ua ho tótal populasaun hamutuk 9.789.
Jornalista : Natalino Belo
Editór : Evaristo Soares Martins
